სამხრეთ აფრიკელი მონადირე სკოტ ვან ზილი გასულ კვირას გაუჩინარდა. ის ზიმბაბვეში, საფარიზე იმყოფებოდა სანადიროდ.

სამხრეთ აფრიკელ მონადირეს თან გაწვრთნილი ძაღლები და ზიმბაბველი მეგზური ახლდა. როგორც ირკვევა, სკოტ ვან ზილი და მეგზური ბუჩქნარით დაფარულ ადგილებში სხვადასხვა მიმართულებით წავიდნენ. მოგვიანებით, ძაღლები ბანაკებს ვან ზილის გარეშე დაუბრუნდნენ. მისი ნივთები მანქანაში აღმოაჩინეს.

მის მოსაძებნად მალევე გამოიყო სამაშველო რაზმი. მონადირეს ეძებდნენ ვერტმფრენიდან, ხმელეთზე და წყალქვეშაც კი. მაშველებმა მისი ნაკვალევი და ზურგჩანთა მდინარის სანაპიროზე შეამჩნიეს.

როგორც სამძებრო ღონისძიებების ერთ-ერთი მონაწილე ამბობს, პოლიციის აზრით, სავარაუდოდ, სამხრეთ აფრიკელი მონადირე ლიმპოპოს მდინარის ნაპირზე ორმა ნიანგმა შეჭამა.

"ჩვენ ვფიქრობთ, რომ ცხოველებში ადამიანის სხეულის ნაწილებია" - ამბობს მაშველი The Telegraph-თან საუბარში.

ნიანგების კუჭში აღმოჩენილი ადამიანის ნაწილები მართლა ვან ზილს ეკუთვნის თუ არა, ამას ექსპერტიზა დაადგენს.

სკოტ ვან ზილი პროფესიონალი მონადირე იყო, რომელიც უცხოელებისთვის სპეციალურ ტურებს აწყობდა ხოლმე. ის დიდი პოპულარობით არ გამოირჩეოდა, რადგან სპილოებზე, ლომებსა და სხვა ეგზოტიკურ ცხოველებზე ნადირობდა.