ჯოან როულინგმა ტვიტერის მეშვეობით სასწრაფო მიმართვა გაავრცელა უკრაინის ობოლ ბავშვთა თავშესაფარში დარჩენილთა დასახმარებლად.

მისი საქველმოქმედო ორგანიზაცია, სახელად Lumos, უკრაინის ობოლ ბავშვთა დასახმარებლად საკვების, მედიკამენტებისა და ჰიგიენისთვის საჭირო ნივთებისთვის თანხას აგროვებს. გარდა ამისა, ორგანიზაცია სხვადასხვა გზას ეძებს, რათა ბავშვებს უკრაინის დატოვებაში დაეხმაროს.

ორგანიზაციის მიერ შეგროვებული თანხის ნაწილი რუსეთ-უკრაინის ომის შედეგად დაზარალებული ბავშვების ფსიქოლოგიურ დახმარებასაც ითვალისწინებს.

"ომი პატარებს ბავშვობას უმახინჯებს და მათ ოჯახებსაც ანგრევს. ამიტომ Lumos უკრაინის ბავშვთა სახლებში ჩარჩენილი ბავშვების დასახმარებლად საგანგებო მიმართვას ავრცელებს", — წერს როულინგი თავის ტვიტერზე.

ორგანიზაციის ვებგვერდზე კი ვკითხულობთ, რომ უკრაინაში რუსეთის შეჭრა "უამრავი ბავშვის საფრთხეში ყოფნას ნიშნავს".

Lumos-ის მონაცემებით, უკრაინის ობოლთა თავშესაფარში 1500-ზე მეტი ბავშვია ჩარჩენილი, ხოლო ათასობით პატარას მშობლების გარეშე ცხოვრება ემუქრება. როულინგის ორგანიზაცია უკრაინის მთავრობასთან თანამშრომლობს, რათა ომის შედეგად დაზარალებული ბავშვები დაიცვას.

ფოტო: WHO

ჰარი პოტერის ავტორმა, ჯოან როულინგმა, საქველმოქმედო ორგანიზაცია Lumos 2005 წელს დააარსა. ორგანიზაციის მიზანია ისეთი სამყაროს შექმნა, რომელშიც "თითოეული ბავშვი უსაფრთხო და მოსიყვარულე ოჯახში გაიზრდება".