ფორმულას ჟურნალისტს, რატი წვერავას სასამართლოსთან, სავარაუდოდ, ძალადობრივ, ჰომოფობიურ და პრორუს ჯგუფებთან დაკავშირებული პირები დახვდნენ. კადრებში ისმის, რომ ისინი ჟურნალისტს დაემუქრნენ.

"სულ დაცვა ვერ გაგაცილებს", — უთხრა ერთ-ერთმა წვერავას.

ჟურნალისტი სასამართლო დარბაზში ჩვენებას 5 ივლისის ძალადობის საქმესთან დაკავშირებით აძლევდა. მისი თქმით, პროცესის დამთავრების შემდეგ მასთან უცნობი პირები მივიდნენ და უთხრეს, რომ "საქმე უნდა გაერკვიათ".

"დღევანდელი სხდომის შემდეგ, კიდევ ერთხელ გამოჩნდა პუტინისტების ჯგუფის წარმომადგენლების რეალური სახე. იმის ნაცვლად, რომ მათ მოინანიონ ის დანაშაული, რომელიც ჩაიდინეს 5 ივლისს, კვლავ იმუქრებიან, აგრესიით არიან განწყობილი ჟურნალისტების მიმართ და მზად არიან ძალადობისთვის. აი, ამ დღეს გამოჩნდა, მას შემდეგ რაც დავტოვე სასამართლო დარბაზი, გამოვიკითხე როგორც მოწმე, მოვიდნენ ვიღაც გაურკვეველი პირები, მითხრეს რომ უნდა გაგვერკვია საქმე", — ეუბნება წვერავა ფორმულას გადამღებ გუნდს.

5 ივლისის საქმის განხილვის პარალელურად, შეურაცხყოფა მიაყენეს ასევე რუსთავი 2-ის გადამღებ ჯგუფს.

ამ ფაქტთან დაკავშირებით, კოალიცია მედიის ადვოკატირებისთვის დაუყოვნებლივ რეაგირებას ითხოვს. მათი თქმით, ეს მნიშვნელოვანია მედიისა და გამოხატვის თავისუფლების დასაცავად და მედიის წარმომადგენლებისთვის უსაფრთხო სამუშაო გარემოს უზრუნველსაყოფად.

"კოალიცია მედიის ადვოკატირებისთვის მიიჩნევს, რომ 2 მარტს სასამართლოს ეზოში განვითარებული მოვლენები შეიცავს სავარაუდო დანაშაულის ნიშნებს და მოუწოდებს სამართალდამცავ ორგანოებს განახორციელონ სწრაფი და ეფექტიანი გამოძიება სავარაუდო დამნაშავეების გამოვლენისა და სისხლისსამართლებრივ პასუხისგებაში მიცემის მიზნით", — წერს ორგანიზაცია.

On.ge დაუკავშირდა შინაგან საქმეთა სამინისტროს დაიწყეს თუ არა მომხდარზე გამოძიება და პასუხს მიღებისთანავე შემოგთავაზებთ.

რატი წვერავას წინა სხდომაზე უშუალოდ სასამართლო დარბაზში დაემუქრნენ. 22 თებერვლის სხდომაზე წვერავამ ძალადობრივი განცხადებების ავტორები "არაკაცებად" მოიხსენია, რის გამოც ბრალდებულმა აგრესია გამოხატა და დაემუქრა: "გამომიშვით 1 წუთი და დამიმატეთ მერე 6 წელი რა, მიმიშვით ერთი ამ არაკაცთან".

ფორმულას ჟურნალისტს, რატი წვერავას ჰომოფობიურმა და ძალადობრივმა ჯგუფის წევრებმა 5 ივლისს გამართულ ძალადობრივ კონტრაქციაზე სცემეს. ჟურნალისტის თქმით, მას სასულიერო პირები ურტყამდნენ და ფიზიკურად უსწორდებოდნენ. სრულად დაიმტვრა ტექნიკაც.

5-6 ივლისს ძალადობრივი კონტრაქციის მონაწილე ჰომოფობიური ჯგუფების მიერ მედიაზე ძალადობის შედეგად ათობით ჟურნალისტი დაშავდა, TV პირველის ოპერატორი, ლექსო ლაშქარავა კი, რომელიც მძიმედ იყო დაშავებული 11 ივლისს გარდაიცვალა.