მიმდინარე მოვლენებიდან გამომდინარე, ასოციაციამ მიიღო გადაწყვეტილება, ინკლუზიის ირგვლივ დაგეგმილი აქტივობები შეეცვალა და აქცენტი მხოლოდ და მხოლოდ უკრაინელი ხალხის მხარდაჭერაზე გაეკეთებინა.

უკრაინის საელჩო საქართველოში ჰუმანიტარულ რესურსებს აქტიურად აგროვებს, პრიორიტეტულ პროდუქტებს შორის ერთ-ერთი წინდა აღმოჩნდა. საქართველოს დაუნის სინდრომის ასოციაციამ, სოციალურ საწარმო ბაბალესთან ერთად, უკრაინელ ხალხს 1 530 წინდა გაუგზავნა

ყოველწლიური კამპანია #წინდამინდა, რომელიც დაუნის სინდრომის მქონე მოზარდების ნახატებით შექმნილი წინდებით ფანდრაიზინგს ახორციელებს, განახლებული ეგიდით ჩატარდება — კამპანია უკრაინელი ხალხის მხარდასაჭერად მიმდინარეობს.

ფოტო: საქართველოს დაუნის სინდრომის ასოციაცია

ასოციაციის ინიციატივით, 28 თებერვლიდან:

  • წინდების გაყიდვებიდან შემოსული თანხის 10% გადაერიცხება უკრაინის დაუნის სინდრომის ასოციაციას.

  • #შეიძინემხარდაჭერისთვის — სურვილის შემთხვევაში, შეძენილი წინდა გაეგზავნება უკრაინელ ხალხს.

თუ პირდაპირი დონაციის სურვილი გაქვთ, შეგიძლიათ თანხა გადარიცხოთ "გიგოს ფონდის" ანგარიშზე: GE71BG0000000103082111GEL

შემოსული თანხით ფონდი უზრუნველყოფს მედიკამენტებისა და პირველადი საჭიროების ნივთების შეძენასა და გაგზავნას უკრაინაში.

საქართველოს დაუნის სინდრომის ასოციაცია, რომელიც Down Syndrome International-ის პარტნიორია, წელს მეთერთმეტედ უერთდება მსოფლიო საზოგადოებას და დაუნის სინდრომის დღეს აღნიშნავს.

ფოტო: საქართველოს დაუნის სინდრომის ასოციაცია

ყოველწლიურად, 21 მარტის აღსანიშნავად, მუშავდება მსოფლიო გზავნილი, რომლის ირგვლივაც ერთიანდება დაუნის სინდრომის მქონე ადამიანების საჭიროებებზე მორგებული ორგანიზაციები, მათი სამუშაო პროცესები, მიმდინარე წლის სამომავლო გეგმები და ა.შ.

2022 წელს მთავარი გზავნილია: #ინკლუზიანიშნავს

ინკლუზიური გარემოს შექმნა ნიშნავს დაუნის სინდრომის მქონე ადამიანის სრულყოფილ ჩართვასა და მონაწილეობას საზოგადოებაში.

ინკლუზი ანიშნავს არა მხოლოდ შეზღუდული შესაძლებლობების მქონე ადამიანების სრულყოფილ ინტეგრაციას საზოგადოებაში, არამედ ყველა ადამიანის თავისუფალ, თანასწორ, მშვიდობიან გარემოში ცხოვრებას.