ცოტა ხნის წინ ინტერნეტსივრცეში პეტიცია შეიქმნა, რომელიც შექმნილი გარემოებებიდან გამომდინარე ევროკავშირში აღმოსავლეთ პარტნიორობის რეგიონის სამეულის — უკრაინის, მოლდოვისა და საქართველოს — დაჩქარებული წესით მიღებას ითხოვს. პეტიციაში, რომელიც ევროკავშირის სხვადასხვა ინსტიტუტის ხელმძღვანელებს მიემართებათ, ვრცლად არის ახსნილი ის გეოპოლიტიკური ფაქტორები, რომელთა გამოც აღნიშნული გადაწყვეტილების მიღება რეგიონისთვის კრიტიკულად მნიშვნელოვანია; მათ შორის, წინაპირობები — 2008 წლის ომი საქართველოში და ქვეყნის ტერიტორიის 20 პროცენტის ოკუპირება.

"მოხარულები ვართ, რომ ევროპული საბჭოს და ევროკომისიის პრეზიდენტები, ევროკავშირის წევრ სახელმწიფოებთან და ევროპარლამენტის წევრებთან ერთად, უკრაინის ევროპული მისწრაფებებისა და წევრობის პერსპექტივის სერიოზულად განხილვას აპირებენ. გვსურს, ვთხოვოთ ევროკავშირის ინსტიტუტებსა და ევროკავშირის წევრ სახელმწიფოებს, უკრაინას ორგანიზაციის წევრობისკენ გზა გაუხსნას", — წერია პეტიციის ტექსტში.

ამასთან, ახსნილია, თუ რატომ არის უკრაინის, საქართველოსა და მოლდოვის მდგომარეობები იდენტური და, შესაბამისად — საჭირო, სამივე მათგანი გახდეს ევროკავშირის წევრი ქვეყანა.

"ქართველი ხალხი სრულ სოლიდარობას უცხადებს უკრაინას დამოუკიდებლობისთვის ბრძოლასა და ევროპისკენ მისწრაფებაში. ჩვენ მტკიცედ გვწამს, რომ ევროპული კავშირი და წევრი სახელმწიფოები აღმოსავლეთ პარტნიორობის რეგიონის სამეულს — უკრაინას, საქართველოსა და მოლდოვას — უნდა მიუდგნენ ერთ განუყოფელ რეგიონად, რომელსაც საერთო პრობლემებთან: რუსულ აგრესიასთან, ოკუპაციასა და ანექსირებასთან, გამკლავება უხდება. ამდენად, ვიმედოვნებთ, რომ ევროკავშირი დადებითად უპასუხებს უკრაინის მიერ წევრობის მოთხოვნას და იმგვარადვე გაუღებს კარს საქართველოსა და მოლდოვის ევროპულ პერსპექტივებს".

პეტიცია 21 ქართული ორგანიზაციის მომზადებულია. მას წინ უძღოდა 28 თებერვლის რამდენიმე მნიშვნელოვანი სიახლე: პრეზიდენტმა ზელენსკიმ ევროკავშირს უკრაინის დაჩქარებული წესით გაწევრიანების თხოვნით მიმართა. მალევე სტრატეგია აღმაშენებლის ერთ-ერთი ლიდერმა, სერგო ჩიხლაძემ, განაცხადა, რომ ევროკავშირის დოკუმენტში გაჩნდა ჩანაწერი უკრაინასთან ერთად საქართველოსა და მოლდოვის დაჩქარებული გაწევრიანების შესახებაც.

პეტიციას შეგიძლიათ ხელი მოაწეროთ ამ ბმულზე.