ნატალია აბლეევამ თავისი მშობლიური ქალაქის, კამენეც-პოდოლსკის, მკვიდრი ორი ბავშვი გასულს შაბათს უნგრეთის საზღვარზე გადაიყვანა. ნატალია ბავშვების დედას არ იცნობდა და მას მხოლოდ ტელეფონზე ესაუბრა, თუმცა მაინც გადაწყვიტა, რომ დედისთვის ბავშვები მიეყვანა და ეს პასუხისმგებლობა საკუთარ თავზე აიღო.

ბავშვების 38 წლის მამაც ნატალიას მშობლიურ ქალაქში ცხოვრობს, თუმცა მას მესაზღვრეები ქვეყნის დატოვების უფლებას არ აძლევდნენ. ამის მიზეზი კი ის არის, რომ უკრაინაში 18-60 წლამდე კაცებს ქვეყნის დატოვება ეკრძალებათ, რათა თავიანთი სამშობლოსთვის ბრძოლას შეუერთდნენ.

ფოტო: Reuters

როცა ნატალია უკრაინის დატოვებას თავადაც ცდილობდა და საზღვრის გადამკვეთთა რიგში იდგა, სწორედ მაშინ შეხვდა ბავშვებსა და მათ მამას. "ბავშვების მამა მენდო და მათი პასპორტებიც გადმომცა", — ამბობს 58 წლის ნატალია, რომელიც ბავშვებზე რამდენიმე საათის განმავლობაში ზრუნავდა.

ბავშვების უკრაინელი დედა იტალიიდან ბრუნდებოდა, რათა საზღვარზე შვილებს შეხვედროდა. ნატალიას ბავშვების მამამ მათი დედის ტელეფონის ნომერი მისცა, შვილებიც ჩააბარა და დაემშვიდობა.

საზღვრის გადაკვეთიდან ცოტა ხნის შემდეგ ბავშვების დედაც გამოჩნდა. მან ნატალიას მადლობა გადაუხადა, მისთვის უცნობს ქალს ჩაეხუტა და რამდენიმე წუთის განმავლობაში ტიროდა.ასე რომ, ნატალიას დახმარებით, დედამ შვილების უსაფრთხოდ დაბრუნება შეძლო.

ფოტო: Reuters

ნატალია აბლეევა თავადაც დედა, თუმცა ორი ზრდასრული შვილის უკრაინაში დატოვება მოუწია. მისი ერთი შვილი პოლიციელია, ხოლო მეორე — მედდა. მათი პროფესიებიდან გამომდინარე, უკრაინის მთავრობის ახალი განკარგულების მიხედვით, ნატალიას შვილებს ქვეყნის დატოვება ეკრძალებათ.