საქართველოს ეროვნული ბანკის განცხადებით, სანქცირებული VTB ბანკი საქართველოში ოპერირებას აგრძელებს. მათი თქმით, ეროვნულ ბანკს მასთან ერთად სანქციების დაწესების შემთხვევაში სამოქმედო გეგმა ჰქონდა შემუშავებული, ამიტომ ბანკი ამ სიტუაციისთვის მზადაა.

"პოტენციური რისკების განეიტრალების მიზნით, საქართველოს ეროვნულ ბანკს VTB ბანკთან ერთად ადრევე შემუშავებული ჰქონდა სანქციების დაწესების შემთხვევაში სამოქმედო გეგმა. შედეგად, როგორც ბანკი, ისე სები დღევანდელი სიტუაციისთვის სრულიად მზად არის.

ბანკი გადახდისუნარიანია და მისი მეანაბრეების ინტერესები სრულად არის დაცული. VTB ბანკი აღნიშნული შეზღუდვების გათვალისწინებით, აგრძელებს ოპერირებას. დამატებითი ლიკვიდობის საჭიროების შემთხვევაში, სებ-ი მზად არის ბანკი შესაბამისი ფინანსური რესურსით უზრუნველყოს", — ნათქვამია განცხადებაში.

უკრაინაში შეჭრის გამო რუსული კომპანიებისთვის სანქციების დაწესების შესახებ ამერიკის შეერთებული შტატების პრეზიდენტმა, ჯო ბაიდენმა განაცხადა. მისი თქმით, რუსეთს გაეყინება ყველა აქტივი, რაც აშშ-ში აქვს.

პუტინმა უკრაინაში ომი 24 თებერვალს დაიწყო, რომელსაც თავად სპეციალურ "სამხედრო ოპერაციას" უწოდებს.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

გაიგეთ მეტი: