პარლამენტის თავმჯდომარის, შალვა პაპუაშვილის განცხადებით, უკრაინის საკითხზე რიგგარეშე საპარლამენტო სხდომის ჩანიშვნის საჭიროებას ვერ ხედავს. მისი თქმით, დღეს ომის შეჩერება მხოლოდ საერთაშორისო მეგობრობის მკაფიო და ქმედებითი ღონისძიებებითაა შესაძლებელი.

"დღეს არის ერთადერთი ამოცანა, ეს არის ომის შეჩერება. ეს შესაძლებელია მხოლოდ საერთაშორისო თანამეგობრობის მკაფიო და ქმედითი ღონისძიებებით. რაც შეეხება ჰუმანიტარულ დახმარებას, ჩვენ, რა თქმა უნდა, ყველანაირად გვერდით დავუდგებით უკრაინას [...] საერთაშორისო თანამეგობრობის ხელშია ეს ინსტრუმენტები და ჩვენ, რა თქმა უნდა, ამას მოვუწოდებთ და ყველანაირად, ამას ხელს შევუწყობთ. რაც შეეხება პარლამენტის საგანგებო სხდომას, არამგონია, საჭირო იყოს, ვინაიდან პარლამენტში დღეს ამ საკითხის განხილვის დიდ აუცილებლობას ჯერჯერობით ვერ ვხედავ", — განაცხადა მან.

საპარლამენტო ოპოზიცია რუსეთის უკრაინაში შეჭრისა და ომის პარალელურად რიგგარეშე საპარლამენტო სხდომის მოწვევას ითხოვს. მათივე თქმით, ამავე სხდომაზე უკრაინის მხარდამჭერი რეზოლუცია უნდა იქნას მიღებული.

პუტინმა უკრაინაში ომი დაიწყო, რომელსაც თავად სპეციალურ "სამხედრო ოპერაციას" უწოდებს და მიზეზად ოკუპირებული დონეცკისა და ლუგანსკის სეპარატისტი ლიდერების "დახმარების თხოვნას" ასახელებს. ის ამტკიცებს, თითქოს ეს "ოპერაცია" არის თავდაცვა მათგან, ვინც "უკრაინა ტყვედ აიყვანა". ტრადიციულ პროპაგანდისტულ მოტივებზე პუტინი იმეორებს, რომ არ აპირებს უკრაინის ოკუპაციას და უკრაინელი ხალხის თვითგამორკვევის უფლებას უჭერს მხარს.

უკრაინის შინაგან საქმეთა მინისტრის მრჩეველის, ანტონ გონჩარენკოს განცხადებით, განხორციელდა სარაკეტო დარტყმები სამხედრო ადმინისტრაციის ცენტრებზე, აეროდრომებზე, სამხედრო საცავებზე, კიევთან, ხარკოვთან, დნეპერთან. მისივე თქმით, ხდება საზღვრის საარტილერიო დაბომბვა.

უკრაინის საგარეო საქმეთა მინისტრი, დმიტრი კულება აცხადებს, რომ რუსეთმა მათ წიანააღმდეგ სრულმასშტაბიანი ომი დაიწყო და მშვიდობიან ქალაქები იბომბება. მისი თქმით, უკრაინა თავს დაიცავს და მსოფლიომ პუტინი ახლავე უნდა შეაჩეროს.

უკრაინის პრეზიდენტმა, ვოლოდიმირ ზელენსკიმ სამხედრო მდგომარეობა გამოაცხადა. მან მოუწოდა ხალხს, არ აყვნენ პანიკას. მისი თქმით, ყველაფრისთვის მზად არიან და ყველას დაამარცხებენ.

გაიგეთ მეტი:

• რუსეთმა ომი დაიწყო, რა ხდება უკრაინაში — განახლებადი