შინაგან საქმეთა სამინისტრომ ძალადობის, ასევე პირადი ცხოვრების ამსახველი საიდუმლოების უკანონოდ მოპოვებისა და სოციალური ქსელით გავრცელების ბრალდებით 1987 წელს დაბადებული ვ.გ. დააკავა.

"გამოძიებამ დაადგინა, რომ ვ.გ.-მ მიმდინარე წლის 18 თებერვალს, თბილისის ზღვის მიმდებარედ, ერთ-ერთ შენობაში რ.მ.-ზე ფიზიკურად იძალადა. ძალადობის ამსახველი კადრები მოგვიანებით სოციალური ქსელი ფეისბუქის მეშვეობით გავრცელდა", — ამბობენ შსს-ში.

გამოძიება სისხლის სამართლის კოდექსის 156-ე მუხლის მე-2 ნაწილის "ა" ქვეპუნქტით და 157-ე პრიმა მუხლის 1-ლი და მე-2 ნაწილებით მიმდინარეობს, რაც ძალადობით განხორციელებული დევნას, ასევე, პირადი ცხოვრების ამსახველი საიდუმლოების უკანონოდ მოპოვებასა და სოციალური ქსელით გავრცელებას გულისხმობს.

20 თებერვალს სოციალურ ქსელში გავრცელდა ვიდეო, სადაც ჩანს, როგორ ძალადობს სავარაუდოდ, ერთი სასულიერო პირი მეორეზე. კადრების მიხედვით, მოძალადემ იცის, რომ ვიდეოს იღებენ და გადამღებს ეუბნება კიდეც — "არ გათიშო, გადაიღე".

ვიდეო 4 წუთს გრძელდება და ამ დროის განმავლობაში, მოძალადე მეორე პირს სიტყვიერ და ფიზიკურ შეურაცხყოფას აყენებს და რამდენჯერმე ეკითხება — "რატომ ჩაიცვა ანაფორა". მოძალადე მსხვერპლს სახეში მუშტს და წიხლს ურტყამს და აგინებს. მსხვერპლი დახმარებას ითხოვს და გადამღებს სთხოვს, გააშველოს, თუმცა ის პროცესში არ ერევა.

საპატრიარქო ვიდეოს გამოეხმაურა და ამტკიცებს, რომ არცერთი პირი არ არის ბერად აღკვეცილი და უბრალოდ ყოფილი მორჩილები არიან. ისინი ფაქტს "უზნეოს და ყოვლადმიუღებელს" უწოდებენ და ამბობენ, რომ დეტალების დასაზუსტებლად "მიმდინარეობს აქტიური კომუნიკაცია შესაბამის ეპარქიასთან".