რიყის დოქების აუქციონის საწყისი ფასი 10 მლნ იქნება — ამის შესახებ ეკონომიკისა და მდგრადი განვითარების მინისტრმა, ლევან დავითაშვილმა ისაუბრა. დავითაშვილის თქმით, ინვესტორს ექნება ვალდებულება, რომ მინიმუმ 20-მილიონიანი ინვესტიცია, არა უმეტეს 3 წლის განმავლობაში განახორციელოს.

"აუქციონის საწყისი ფასი იქნება 10 მილიონი ლარი და პირობა არის, რომ მინიმუმ 20-მილიონიანი ინვესტიცია განხორციელდეს. შესაბამისად, აუქციონში მონაწილემ გარანტიები უნდა წარმოადგინოს და მეორე მნიშვნელოვანი პირობა არის, რომ არა უმეტეს 36 თვისა (3 წლის) უნდა განხორციელდეს აუქციონის პირობებით განსაზღვრული ობიექტების რეალიზება. მათ შორის, იმ ინვესტიციების განხორციელება, რომელიც ამ პირობით არის მოცემული, ეს არის არა ნაკლებ 20 მლნ ლარი, თუმცა ჩვენ წარმოდგენა გვაქვს, რომ იმ მასშტაბის პროექტების განხორციელებას, რომელზეც დაინტერესებული პირები საუბრობენ, მეტი რესურსი დასჭირდება", — თქვა ეკონომიკისა და მდგრადი განვითარების მინისტრმა.

ლევან დავითაშვილის თქმით, არსებობენ რიყის დოქებით დაინტერესებული პირები, რომელთა მომართვის საფუძველზეც ცვლილება შევიდა აუქციონის პირობებში. მინისტრმა თქვა, რომ მთავრობის სურვილია ამ ტერიტორიაზე გაჩნდეს ტურისტული მიზიდულობის ცენტრი. საუბარია ტექნოლოგიურ, საგამოფენო სივრცეებზე და ღვინის მუზეუმის მოწყობაზე.

როგორც ცნობილია, ეკონომიკისა და მდგრადი განვითარების სამინისტრომ რიყის დოქები გასაყიდად 5-ჯერ გაიტანა, თუმცა ყველა აუქციონი უშედეგოდ დასრულდა. სამინისტრო რიყის დოქებს თავაპირველად 71,25 მილიონად, ხოლო ბოლო აუქციონზე 30 მილიონ ლარად აფასებდა.