გერმანიის კანცლერი, ოლაფ შოლცი უკრაინის პრეზიდენტთან, ვოლოდიმირ ზელენსკისთან შესახვედრად კიევს ეწვევა. ინფორმაციას ამის შესახებ საერთაშორისო მედია, მათ შორის, Reuters ავრცელებს.

მედია წერს, რომ მისი ვიზიტი იმ დიპლომატიური მცდელობის ნაწილია, რომელმაც რუსეთის აგრესიის ზრდის ფონზე, კრიზისის დეესკალაცია უნდა მოახდინოს. სამშაბათს შოლცი მოსკოვში გაემგზავრება და ვლადიმერ პუტინს შეხვდება.

რუსელი ჯარების უკრაინის საზღვრებთან მობილიზების ცნობების ფონზე, მსოფლიო ლიდერებს შორის სატელეფონო საუბარები და პირადი შეხვედრები იმართება. დღეს ვოლოდიმირ ზელენსკიმ ამერიკის შეერთებული შტატების პრეზიდენტი, ჯო ბაიდენი უკრაინაში მიიწვია.

11 თებერვალს ამერიკის შეერთებული შტატების სახელმწიფო მდივანმა, ენტონი ბლინკენმა განაცხადა, რომ რუსეთი უკრაინაში, შეიძლება, ნებისმიერ დროს შეიჭრას. მოგვიანებით ეროვნული უსაფრთხოების საკითხებში აშშ-ის პრეზიდენტის მრჩეველმა, ჯეიკ სალივანმა კი მოუწოდა აშშ-ის მოქალაქეებს, დაუყოვნებლივ დატოვონ უკრაინა.

სხვა ქვეყნებიც, მათ შორის, ბრიტანეთი, ასევე მოუწოდებენ საკუთარ მოქალაქეებს დატოვონ უკრაინა. დიდი ბრიტანეთის ელჩმა უკრაინაში, მელინდა სიმონსმა კი Twitter-ზე დაწერა, რომ კიევში რჩება და გუნდთან ერთად მუშაობას აგრძელებს.

გაიგე მეტი: