კულტურის მინისტრი თეა წულუკიანი პოლიციელის მიერ მოზარდზე ძალადობას ეხმაურება და აცხადებს, რომ კონკრეტული პირები ხელისუფლების ცვლილებას ითხოვენ ამ ინციდენტის გამო, რომელსაც "არ მოჰყოლია არავის სიკვდილი". მისი თქმით, ასეთი ადამიანები ეძებენ საბაბს, რომ "ახალი ჟანგბადი შეიძინონ თავიანთ საქმიანობაში".

მინისტრი მიიჩნევს, რომ შინაგან საქმეთა სამინისტროს "სწრაფი და ადეკვატური" რეაგირება ჰქონდა და ახლა პროცესს უნდა დააკვირდნენ. მისივე თქმით, გამოძიებამ შესაძლოა სრულ სურათს სხვა ელემენტები შესძინოს, "პოლიციელებისთვის კიდევ უფრო საზიანო, ან მათთვის შემამსუბუქებელი". თუმცა, ის იქვე აღნიშნავს, რომ არ იცის, რა შეიძლება იყოს ამგვარი გარემოება.

"ეს ადამიანები დღეს ითხოვენ ხელისუფლების ცვლილებას იმ ინციდენტის გამო, რომელიც არის დაუშვებელი, ტრაგიკული, მაგრამ ამ ინციდენტს არ მოჰყოლია არავის, საბედნიეროდ, სიკვდილი. ორივე პოლიციელი არის დაკავებული და, სავარაუდოდ, არც ადეკვატური სასჯელი დააყოვნებს.

ამიტომაც, რა თქმა უნდა, ისინი ყოველთვის საბაბს ეძებენ იმისთვის, რომ ახალი ჟანგბადი შეიძინონ თავიანთ საქმიანობაში, მაგრამ ეს ჟანგბადი არ იქნა და არ მოდის და ისინი ისევ მწარე რეალობის წინაშე აღმოჩნდებიან ხოლმე", — განაცხადა მან რადიო იმედის ეთერში.

კადრები, სადაც ჩანს, რომ პოლიციელი არასრულწლოვან შშმ პირს სცემს, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს: "ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო". ამის შემდეგ კი ჩანს, რომ ის მოზარდს ურტყამს.

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.