ექსპრეზიდენტი მიხეილ სააკაშვილი პოლიციელის მხრიდან შშმ მოზარდზე ძალადობის ფაქტს ეხმაურება და აცხადებს, რომ პოლიციაში და პენიტენციურ სისტემაში ძალაუფლება მოძალადეებს აქვთ. მისივე თქმით, აქციების ტალღა აჩვენებს, რომ უბრალოდ მოსახლეობა კი არა, არამედ საზოგადოება ვართ.

"მივესალმები საზოგადოების გამოღვიძებას ძალადობისა და ხელისუფლების თავაშვებულობის წინააღმდეგ. სოლიდარობის აქციების ტალღა, რომელმაც დღეს გადაუარა საქართველოს, აჩვენებს, რომ ჩვენ უბრალოდ მოსახლეობა კი არ ვართ, არამედ საზოგადოება. ძალიან ბევრი საინტერესო ლიდერი გამოჩნდა, განსაკუთრებით ქალები. პოლიციაში და პენიტენციურ სისტემაში ძალაუფლება აქვთ მოძალადეებს", — ამბობს ის.

სააკაშვილი მოუწოდებს მოქალაქეებს, თუ შეესწრებიან პოლიციელის მხრიდან ჩადენილ უკანონო ქმედებას, გადაიღონ და მიაწოდონ ვიდეო ტელევიზიებს ან ცნობილ აქტივისტებს. მისი თქმით, უნდა შეჩერდეს "ქართულ პოლიციაში შეღწეული არაადამიანების ბანდა".

"მინდა მოვუწოდო მოქალაქეებს, რომ ყველგან, სადაც შეესწრებიან პოლიციელებისა და სამართალდამცავების მიერ ჩადენილ უკანონო ქმედებას, გადაიღონ და თუ თვითონ ეშინიათ გავრცელების, ტელევიზიებს და ცნობილ აქტივისტებს გადაუგზავნონ. ჩვენ უნდა შევაჩეროთ ქართულ პოლიციაში შეღწეული არაადამიანების ბანდა. ეს უნდა გავაკეთოთ თუნდაც იმიტომ, რომ სისტემაში კიდევ დარჩენილ წესიერ პოლიციელებს მივცეთ მეორე შანსი, ემსახურონ საქართველოს. ასევე, ინდივიდუალურად ვიმუშაოთ ამ წესიერ პოლიციელებთან, რომ ბოლომდე არ ჩაყვნენ ივანიშვილს", — აცხადებს ის.

კადრები, სადაც ჩანს, რომ პოლიციელი მოქალაქეს სცემს, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.