დემოკრატიის კვლევის ინსტიტუტი (DRI) მოითხოვს პოლიციელის მიერ შშმ არასრულწლოვნის ცემის ფაქტის დროულ და ეფექტიან გამოძიებას. საქმე ეხება სოციალურ ქსელში გავრცელებულ ვიდეოს, სადაც ჩანს, რომ მეტროში პოლიციელი არასრულწლოვანს ფიზიკურად უსწორდება.

"ბავშვის დაცვა და მხარდაჭერა შინაგან საქმეთა სამინისტროს თითოეული თანამშრომლის მოვალეობაა. თუმცა, გავრცელებული კადრებით დასტურდება, რომ პოლიციის სისტემაში ბავშვის ინტერესების დაცვა და კანონით დაკისრებული პასუხისმგებლობების შესრულება არ ხდება. პოლიციელების მხრიდან ძალადობის ფაქტებმა სისტემატური სახე მიიღო", — აცხადებენ ორგანიზაციაში.

ორგანიზაცია სახელმწიფო ინსპექტორის აპარატს მოუწოდებს გამოძიების პროცესში სავალდებულოდ ჩართოს ფსიქოლოგი. ასევე, დაზარალებულის მიმართ გამოიყენოს მულტიდისციპლინური მიდგომა განმეორებითი გამოკითხვისა და ხელახალი ვიქტიმიზაციის თავიდან აცილების მიზნით.

DRI მიმართავს შინაგან საქმეთა სამინისტროსაც და მოუწოდებს, უზრუნველყოს პოლიციელების გადამზადება ბავშვთა დაცვის საკითხებში. ასევე, გაატაროს ნულოვანი ტოლერანტობის პოლიტიკა სამართალდამცველების მიერ უფლებამოსილების გადამეტების, ფიზიკური და ფსიქოლოგიური ძალადობის ფაქტებზე.

რაც შეეხება პარლამენტსა და მთავრობას, ორგანიზაცია უმაღლეს საკანონმდებლო და აღმასრულებელ სტრუქტურებს მოუწოდებს დაიწყონ პოლიციის სისტემის რეფორმა ბავშვთა საუკეთესო ინტერესების დაცვის უზრუნველყოფის მიზნით. ასევე, პოლიციელის სტატუსის მინიჭებისთვის აუცილებელ კრიტერიუმი იყოს ბავშვთა დაცვის საკითხების ცოდნა.

კადრები, სადაც ჩანს, რომ პოლიციელი მოქალაქეს სცემს, გუშინ, 24 იანვარს გავრცელდა. თავდაპირველად, ვიდეო ერთ-ერთი მეტროსადგურის ესკალატორზეა გადაღებული, სადაც არასრულწლოვნის თანმხლები პირები პოლიციელს ეუბნებიან, რომ ის ყრუ-მუნჯია, რაზეც პოლიციელი პასუხობს:

"ყრუ-მუნჯია? რომ ავალაპარაკო ახლა? [...] აი, ახლა უნდა ავალაპარაკო".

სახელმწიფო ინსპექტორის განცხადებით ფაქტზე დაკავებულია 2 პოლიციელი. მისივე ინფორმაციით, გამოძიებით დადგინდა, რომ პოლიციელმა ფიზიკურად 17 წლის შეზღუდული შესაძლებლობის პირზე იძალადა. შედეგად, მან დაზიანებები თავისა და სახის არეში მიიღო. ასევე, განიცადა ძლიერი ფიზიკური ტკივილი და თავი დამცირებულად იგრძნო.