საქართველოს პარლამენტის თავმჯდომარის პირველმა მოადგილემ და სახელმწიფო საკონსტიტუციო კომისიის მდივანმა, თამარ ჩუგოშვილმა, დღეს ჟურნალისტებთან საუბრისას განაცხადა, რომ მისი აზრით, კონსტიტუციაში ქორწინების განსაზღვრის შესახებ ჩანაწერი აუცილებელი არაა:

"მე ვფიქრობ, რომ კანონმდებლობით ისედაც არის დარეგულირებული და ჩანაწერი აუცილებელი არ არის, თუმცა უმრავლესობა როგორც კომისიის, ასევე პარტიის, ფიქრობს, რომ ეს რეგულაცია შესაცვლელია".

ჩუგოშვილმა ასევე განმარტა თავისი შეხედლება, პრეზიდენტის არჩევის წესზე წარმოდგენილ საკონსტიტუციო ინიციატივაზე.

"არასწორია მოსაზრება, თითქოს პრეზიდენტს ეზღუდება უფლებამოსილება. პრეზიდენტს რჩება იგივე მანდატი, რაც აქვს დღეს. ჩვენ ვენეციის კომისიის ორი რეკომენდაცია ავსახეთ ცვლილებებში".

მმართველი გუნდის გადაწყვეტილებით, იცვლება საქართველოს კონსტიტუცია, ახალ კონსტიტუციაში კი არაერთი მნიშვნელოვანი ცვლილებაა. მათ შორის, ცვლილებები შეეხება პრეზიდენტის უფლებამოსილებებს, ასევე, კონსტიტუციაში ჩნდება ჩანაწერი ქორწინების რაობის შესახებ.

კონსტიტუციის პროექტით, ქორწინება განსაზღვრულია როგორც კავშირი მხოლოდ ქალსა და მამაკაცს შორის ხოლო ლგბტ წყვილებს დაქორწინება კონსტიტუციის დონეზე ეკრძალებათ.

არასამთავრობო ორგანიზაციები აცხადებენ, რომ ქორწინების აკრძალვის შემთხვევაში, ლგბტ წყვილებს სამოქალაქო პარტნიორობის უფლება უნდა ჰქონდეთ.