ამერიკის შეერთებული შტატების სახელმწიფო მდივნის, ენტონი ბლინკენის განცხადებით, უკრაინა ცდილობს თავის გადარჩენას, რადგან რუსეთსა და უკრაინას შორის ის აგრესორი არაა. მისი თქმით, გადარჩენის მცდელობა არავის უნდა უკვირდეს მაშინ, როცა რუსეთი პროვოკაციას აწყობს.

"რუსეთი ამართლებდა თავის ქმედებებს იმით, რომ უკრაინა რაღაცნაირად საფრთხეს უქმნის მის უსაფრთხოებას. ვისი ჯარები ვის ირგვლივაა? რომელ ქვეყანას აქვს პრეტენზია სხვის ტერიტორიაზე ძალის გამოყენებით? ვისი სამხედრო ძალაა სხვისაზე ბევრად დიდი? რომელ ქვეყანას აქვს ბირთვული იარაღი? უკრაინაა აქ აგრესორი? უკრაინა უბრალოდ ცდილობს გადარჩენას. გადარჩენის მცდელობა არავის არ უნდა გაუკვირდეს, როდესაც რუსეთი პროვოკაციას აწყობს და ამას საკუთარი ქმედების გასამართლებად იყენებს", — ამბობს ბლინკენი.

დღეს ამერიკის შეერთებული შტატების სახელმწიფო მდივანი გერმანიაში, ბერლინში, ჩაფრინდა, სადაც რუსეთის უახლეს დიპლომატიურ ჩართულობას და უკრაინის წინააღმდეგ რუსეთის შემდგომი აგრესიის შესაჩერებლად ერთობლივ ძალისხმევას განიხილავენ.

მანამდე ის უკრაინაში იმყოფებოდა. 19 იანვარს, კიევში ჩასვლის შემდეგ, ბლინკენმა განაცხადა, რომ მცირე დროში სამხედრო ძალების გაზრდა რუსეთის პრეზიდენტს, ვლადიმერ პუტინს უკრაინის წინააღმდეგ აგრესიულად მოქმედების შესაძლებლობას აძლევს.