ევროკავშირის ელჩი საქართველოში, კარლ ჰარცელი ექსპრეზიდენტ მიხეილ სააკაშვილის პერსონალური მონაცემების გასაჯაროებისთვის პენიტენციური სამსახურისა და იუსტიციის სამინისტროს ჯარიმის გაუქმების შესახებ საქალაქო სასამართლოს გადაწყვეტილებაზე აცხადებს, რომ ეს ბევრ კითხვას ბადებს და ასეთი რამე არ უნდა განმეორდეს.

"ძირითადად, ჩვენ არ ვაკეთებთ კომენტარებს სასამართლო გადაწყვეტილებებთან დაკავშირებით, მაგრამ სააკაშვილთან დაკავშირებით ვიდეოების გამოქვეყნებას ვუყურებთ, როგორც ადამიანის უფლებათა მხრიდან და ასევე, საერთაშორისო სამართლის კუთხით. ეს ყველაფერი ბევრ კითხვას იწვევს, ასეთი რამე არ უნდა განმეორდეს", — განაცხადა ჰარცელმა.

რაც შეეხება ინსპექტორის სამსახურის გაუქმებას, ჰარცელის განცხადებით, ამ შემთხვევაში, პრობლემა ორი მიმართულებით არსებობს — ერთი, არის მეთოდი, რომლითაც ამ ინსტიტუტის გაუქმება მოხდა და მეორე, დრო, რა დროშიც ეს განხორციელდა. ჰარცელის თქმით, ევროკავშირი კანონის შემუშავების პროცესს ყურადღებით აკვირდებოდა. მან ინსპექტორის სამსახური მნიშვნელობას გაუსვა ხაზი და აღნიშნა, რომ ის დემოკრატიის საკვანძო კომპონენტია.

"იქიდან გამომდინარე, რომ ევროკავშირი იყო დაინტერესებული პირი, ასევე, ამ სახელმწიფო ინსტიტუციის მხარდამჭერი, არამარტო ისეთი, არამედ ფინანსური მხარდამჭერიც და ეს ინსტიტუტი ერთ-ერთი საკვანძო კომპონენტია დემოკრატიისა. ამიტომ ძალიან მნიშვნელოვანია, ამ შემთხვევაში, შემოწმებისა და ბალანსის მექანიზმი და ძალიან სერიოზული საკითხია, რომელსაც შემდეგი განხილვები უნდა მოჰყვეს. არამარტო ჩვენ გამოვთქვით შეშფოთება, არამედ სხვადასხვა მთავარმა პარტნიორმა ორგანიზაციამ ამ საკითხთან დაკავშირებით თავისი პოზიცია და შეშფოთება გამოთქვეს", — განაცხადა მან.

თბილისის საქალაქო სასამართლომ სახელმწიფო ინსპექტორის სამსახურის მიერ ექსპრეზიდენტ მიხეილ სააკაშვილის პერსონალური მონაცემების გასაჯაროებისთვის პენიტენციური სამსახურის დაჯარიმების გადაწყვეტილება 17 იანვარს გააუქმა.

11 იანვარს სასამართლომ სახელმწიფო ინსპექტორის მიერ იუსტიციის სამინისტროს დაჯარიმების გადაწყვეტილებაც გააუქმა.

7 დეკემბერს სახელმწიფო ინსპექტორის სამსახურმა პენიტენციური სამსახური და იუსტიციის სამინისტრო დააჯარიმა. მათი გადაწყვეტილებით, საქართველოს იუსტიციის სამინისტროსა და სპეციალურ პენიტენციურ სამსახურს სააკაშვილის კვების რაციონის შესახებ ინფორმაციის, "საკვების" მიღების და რუსთავის ციხის დატოვების კადრების გავრცელების გამო პერსონალურ მონაცემთა დაცვის შესახებ საქართველოს კანონის 44-ე მუხლით გათვალისწინებული ადმინისტრაციული პასუხისმგებლობა დაეკისრათ.