ირაკლი კობახიძემ ქართული ოცნების თავმჯდომარეობის ერთი წელი შეაჯამა. მან ჩამოთვალა "შედეგები", რომელიც ამ ერთი წლის თავზე აქვთ. ამის შესახებ მან Facebook-პოსტში ისაუბრა.

"ერთი წლის თავზე, გვაქვს შემდეგი შედეგები: დასრულდა ხელოვნური პოლიტიკური კრიზისი, დამაჯერებლად მოვიგეთ ადგილობრივი თვითმმართველობის არჩევნები და ქართულმა ოცნებამ კიდევ უფრო გაიმყარა ლეგიტიმაცია; ქვეყანას ყავს ღირსეული პრემიერი, ღირსეული პარლამენტის თავმჯდომარე, ღირსეული დედაქალაქის მერი და მმართველი გუნდი ერთიანია, როგორც არასდროს", — წერის ის.

მისივე თქმით, "რადიკალური ოპოზიცია", რომლის ლიდერი "დამსახურებულ სასჯელს იხდის", უკიდურესად დასუსტდა და აღარ აქვს შესაძლებლობა, საფრთხე შეუქმნას სახელმწიფოს სიმტკიცეს.

"მმართველი გუნდი იცავს ეროვნულ ინტერესებს, სახელმწიფო და საპარლამენტო სუვერენიტეტს, მთავრობამ ორნიშნა ეკონომიკური ზრდა უზრუნველყო. მიხარია, რომ ამ შედეგების დადგომაში პარტიის თავმჯდომარის პოზიციიდან ჩემი წვლილი შევიტანე", — აცხადებს კობახიძე.

2021 წლის 16 იანვარს ქართული ოცნების თავმჯდომარის პოსტზე ირაკლი კობახიძე ერთხმად დაამტკიცეს. მან თანამდებობაზე პარტიის დამფუძნებელი ბიძინა ივანიშვილი შეცვალა, რომელიც 2021 წლის 11 იანვარს პოლიტიკიდან მეორედ წავიდა.