KHIDI-ს განცხადებით, სხვა კლუბებთან ერთად დახურვის გადაწყვეტილება მიიღეს და დღეს კლუბში ზამთრის უკანასკნელი ღონისძიება გაიმართება. მათი თქმით, იმედს იტოვებენ, რომ ეპიდმიოლოგიური ვითარების გაუმჯობესების შემდეგ, მარტის დასაწყისში კვლავ გაიხსნებიან.

"ქვეყანაში ეპიდემიოლოგიური მდგომარეობის მკვეთრი გაუარესება, რომელშიც კლუბების წვლილი მინიმალურია, არ გვაძლევს თავაწეულად და სრულფასოვნად ფუნქციონირების საშუალებას. 22-თვიანი უმძიმესი პაუზის შემდეგ, მხოლოდ სამი კვირის მანძილზე შევძელით მუშაობა, ისიც უდიდესი წნეხის ფონზე", — ვკითხულობთ განცხადებაში.

კლუბში აღნიშნავენ, რომ ამ სამი კვირის განმავლობაში მაღალ პასუხისმგებლობას იჩენდნენ და კლუბის სტუმრებისთვის უსაფრთხო სივრცეში მოსახვედრად გამკაცრებულ კარის პოლიტიკას ზედმიწევნით იცავდნენ. მათი თქმით, კლუბების დახურვით გამოწვეული სიმძიმე პირველივე დღეებში იჩენს თავს და ელექტრონული მუსიკის წამყვან არტისტებს, სფეროს პროფესიონალებსა და რიგით თანამშრომლებს მძიმედ დააწვებათ.

გუშინ, 13 იანვარს მსგავსი განცხადება გაავრცელა ბასიანმაც. მათი თქმით, ეპიდემიოლოგიური მდგომარეობის გათვალისწინებით, 14 და 15 იანვრის დაგეგმილი საკლუბო ღამეები ამ ეტაპისთვის, იქნება ბოლო, რომელიც მათ სივრცეში გაიმართება.