საქართველოს კონსტიტუციის პროექტის მიხედვით, სახალხო დამცველი მხოლოდ ერთი ვადით აირჩევა. უფლებამოსილების ვადა უცვლელი რჩება და ხუთწლიანი იქნება.

დღეს მოქმედ კონსტიტუციაში არ არის დათქმა თუ რამდენჯერ არის შესაძლებელი სახალხო დამცველის არჩევა. თუმცა, არჩევის წესთან დაკავშირებით ვკითხულობთ "საქართველოს სახალხო დამცველის შესახებ" კანონში. ამ კანონის მიხედვით, ერთი და იმავე პირის სახალხო დამცველად არჩევა შესაძლებელია ზედიზედ მხოლოდ ორჯერ. კანონი არ გამორიცხავს, რომ ერთ დროს უკვე ამ თანამდებობაზე დასაქმებული პირი არაერთხელ გახდეს სახალხო დამცველი.

ქართული ოცნების მიერ წარდგენილ კონსტიტუციის პროექტში კი არჩევის ციკლის შესახებ ნორმა კონსტიტუციაშივე გაჩნდა.

კონსტიტუციის პროექტი ქართულმა ოცნებამ საკონსტიტუციო კომისიის სამუშაო ჯგუფებში გამართული კონსულტაციების შემდეგ წარადგინა.