1 წლის ბავშვმა, რომელიც ჰელოუინისთვის დედოფლის ფორმაში გამოეწყო, მონარქ ელისაბეთ II-სგან წერილი მიიღო, რომელშიც ნათქვამია, რომ პატარამ "შესანიშნავი ჩაცმულობა" შეარჩია.

ბავშვის დედამ პატარა ჯალაინი დედოფლის კოსტიუმში გამოაწყო და თანამგზავრად ორი კორგიც გააყოლა. "ჯალაინი გიჟდება თავის ლეკვებზე. ეს სამოსი კი საუკეთესო გზა იყო, რათა პატარასა და მის ლეკვებს შორის მეგობრობა გამოგვეხატა", — ამბობს ბავშვის დედა.

ცნობილი ფაქტია, რომ ჯალაინის მსგავსად, დედოფალ ელისაბეთ II-საც ძალიან უყვარს კორგები და მონარქს 1945 წლიდან დღემდე 30-ზე მეტი ამ ჯიშის ძაღლი ჰყავდა.

ჯალაინის დედამ დედოფლის სამოსში გამოწყობილი შვილის ფოტოები ფეისბუქზე განათავსა და ბევრი მოწონებაც დაიმსახურა. შემდეგ კი ბავშვის ფოტოები დედოფალსაც გაუგზავნა.

ფოტო: Insider

იმის მიუხედავად, რომ ჯალაინის დედა სამეფო ოჯახისგან გამოხმაურებას არ ელოდა, ერთი თვის შემდეგ დედოფალ ელისაბეთ II-ის დავალებით მას წერილი გამოუგზავნეს. "მის უდიდებულესობას მოეწონა თქვენი წერილი და ძალიან გაუხარდა პატარა ჯალაინის ფოტოების ნახვა, რომელსაც მისი თქმით, შესანიშნავი ჩაცმულობა შეურჩევია", — ვკითხულობთ წერილში.

"ჩვენ აღფრთოვანებულები ვართ და გულწრფელად რომ გითხრათ, ეს შოკიც იყო. ამ წერილს სამუდამოდ შევინახავთ", — ამბობს ჯალაინის დედა დედოფლის პასუხის შესახებ.