მთავრობის გადადგომის მიუხედავად ყაზახეთში პროტესტი გრძელდება. ტელეგრამის არხებით ადგილობრივები ავრცელებენ ფოტოებსა და ვიდეოებს, რომლებშიც პოლიციასთან შეტაკება ჩანს. ინფორმაციების დადასტურდება გართულებულია, რადგან მედიის წარმომადგენლებს ადგილზე მუშაობა უჭირთ. რამდენიმე საათის წინ აცხადებდნენ, რომ ქვეყანაში გათიშულია მობილური ინტერნეტი და დაბლოკილია საკომუნიკაციო აპლიკაციები. მოგვიანებით გავრცელდა ინფორმაცია ხაზის ინტერნეტისა და რამდენიმე ტელევიზიის გათიშვაზ

მოქალაქეების ცნობით, ქალაქის ცენტრში აფეთქებების ხმა ისმოდა და ერთ-ერთ ადმინისტრაციულ შენობაში ცეცხლი გაჩნდა. მოხმარებლების ნაწილი წერს, რომ ეს პრეზიდენტის სასახლეა, თუმცა BBC-ის რუსული ბიურო მიიჩნევს, რომ ეს შეცდომაა. ამბობენ იმასაც, რომ დემონსტრანტებმა ქალაქის მერიის შენობა აიღეს.

ოფიციალური წყაროების ინფორმაციით, შეტაკებების შედეგად დაშავებულია 500-ზე მეტი ადამიანი და დაიწვა 120 მანქანა. ვრცელდება ინფორმაცია, მმართველი პარტიის ოფისში გაჩენილ ხანძარზეც, რაც ჯერ არ დადასტურებულა.

ადგილობრივი მედიების ინფორმაციით, ყაზახეთის პრეზიდენტმა საგანგებო მდგომარეობა დედაქალაქში ნურ სულთანშიც დააწესა. აქამდე ეს წესები მხოლოდ ერთ ქალაქსა და ოლქზე ვრცელდებოდა.

სპეცრაზმი დემონსტრანტების წინააღმდეგ ცრემლსადენ გაზს, სპეციალურ შუშხუნებს და წლის ჭავლს იყენებს.

ფოტო: Reuters

მასობრივი აქციებისა და დაპირისპირების შემდეგ ყაზახეთის მთავრობა გადადგა. სამთავრობო გუნდის გადადგომა პრეზიდენტმა მას შემდეგ ჩაიბარა, რაც პროტესტის კერებში 2-კვირიანი საგანგებო მდგომარეობა გამოაცხადა. აქციები ყაზახეთის რამდენიმე დასახლებაში მას შემდეგ დაიწო, რაც მთავრობის გადაწყვეტილებამ საწვავზე, გათხევადებულ გაზზე ფასების ზრდა გამოიწვია.

პრეზიდენტი ყასიმ-ჟომართ ტოყაევი პროტესტში "დესტრუქციულ ადამიანებს" ადანაშაულებდა, რომლებსაც "საზოგადოების ერთობის დაშლა სურთ" და ამბობდა, რომ სახელმწიფო შენობებზე ნებისმიერი ტიპის თავდასხმა უკანონობაა. მანვე განაცხადა, რომ მთავრობა ფასების ზრდის განსახილველად შეიკრიბებოდა, თუმცა მალევე მათი გადადგომა გადაწყდა.

პრეზიდენტმა პრემიერმინისტრის მოვალეობის შემსრულებლად ალიხან სმაილოვი დანიშნა, რომელიც მანამდე ვიცე-პრემიერი იყო და მინისტრების მოვალეობის შემსრულებლებს საწვავის ფასების დასტაბილურებაზე მუშაობა დაავალა.

საგანგებო მდგომარეობის ფარგლებში ალმათსა და მანგისთაუს რაიონში 7 საათამდე კომენდანტის საათია დაწესებული, აკრძალულია გადაადგილება და მასობრივი შეკრებები.