საწვავის ფასის ზრდის გამო მასობრივი აქციებისა და დაპირისპირების შემდეგ ყაზახეთის მთავრობა გადადგა. სამთავრობო გუნდის გადადგომა პრეზიდენტმა მას შემდეგ ჩაიბარა, რაც პროტესტის კერებში 2-კვირიანი საგანგებო მდგომარეობა გამოაცხადა.

აქციები ყაზახეთის რამდენიმე დასახლებაში სამშაბათს დაიწყო, მას შემდეგ, რაც მთავრობის გადაწყვეტილებამ საწვავზე, გათხევადებულ გაზზე ფასების ზრდა გამოიწვია. ადგილობრივი სამართალდამცავი ორგანოების განცხადებით, დემონსტრანტებმა გადაკეტეს გზები და შეაფერხეს საზოგადოებრივი ტრანსპოტის მოძრაობა. როგორც Reuters წერს, პოლიციამ დემონსტრანტების წინააღმდეგ ცრემლსადენი გაზი და სპეციალური შუშხუნები გამოიყენა.

ფოტო: REUTERS/Pavel Mikheyev

DW ოფიციალურ წყაროებზე დაყრდნობით აცხადებს, რომ აქციებზე დააკავეს 200-ზე მეტი პირი და დაშავდა 95-ზე მეტი სამართალდამცავი. დაშავებულ დემონსტრანტებზე ინფორმაცია უცნობია.

The Guardian-ის ცნობით, აქციების პარალელელურად ქვეყანაში გაითიშა მობილური ინტერნეტი და დაბლოკილი იყო საკომუნიკაციო აპლიკაციები.

პრეზიდენტი ყასიმ-ჟომართ ტოყაევი პროტესტში "დესტრუქციულ ადამიანებს" ადანაშაულებდა, რომლებსაც "საზოგადოების ერთობის დაშლა სურთ" და ამბობდა, რომ სახელმწიფო შენობებზე ნებისმიერი ტიპის თავდასხმა უკანონობაა. მანვე განაცხადა, რომ მთავრობა ფასების ზრდის განსახილველად შეიკრიბებოდა, თუმცა მალევე მათი გადადგომა გადაწყდა.

პრეზიდენტმა პრემიერმინისტრის მოვალეობის შემსრულებლად ალიხან სმაილოვი დანიშნა, რომელიც მანამდე ვიცე-პრემიერი იყო და მინისტრების მოვალეობის შემსრულებლებს საწვავის ფასების დასტაბილურებაზე მუშაობა დაავალა.

საგანგებო მდგომარეობის ფარგლებში ალმათსა და მანგისთაუს რაიონში7 საათამდე კომენდანტის საათია დაწესებული, აკრძალულია გადაადგილება და მასობრივი შეკრებები.