სახელმწიფო უსაფრთხოების სამსახურის ცნობით, ანტიკორუფციული სააგენტოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, განსაკუთრებით დიდი ოდენობით ქრთამის აღების ფაქტზე სამგორის რაიონის გამგეობის მთავარი სპეციალისტი, ირაკლი ლაბაძე დააკავეს.

გამოძიების მტკიცებით, ირაკლი ლაბაძე ისრაელის მოქალაქეს მის საკუთრებაში არსებულ მიწის ნაკვეთზე სამსართულიანი სახლის აშენების ნებართვის გაცემაში დახმარებას დაჰპირდა, რის სანაცვლოდაც ქრთამის სახით 20 000 აშშ დოლარი მოსთხოვა.

უწყების ცნობით, ლაბაძემ ქრთამის სახით მოთხოვნილი თანხის ნაწილი - 7500 აშშ დოლარი წინასწარ აიღო, რა დროსაც იგი დააკავეს.

თბილისის საქალაქო სასამართლომ ირაკლი ლაბაძეს აღკვეთის ღონისძიების სახით შეეფარდა პატიმრობა.

გამოძიება განსაკუთრებით დიდი ოდენობით ქრთამის აღების ფაქტზე სსკ-ის 338-ე მუხლის მე-3 ნაწილის „ე“ ქვეპუნქტით მიმდინარეობს, რაც ითვალისწინებს თავისუფლების აღკვეთას 11-დან 15 წლამდე ვადით.