კეინ ტანაკას შესახებ ჯერ კიდევ 2020 წლის დასაწყისში გიამბეთ, როცა მას 117 წელი შეუსრულდა და როგორც ყველაზე ასაკოვანმა ადამიანმა მსოფლიოში, გინესის რეკორდი მოხსნა.

სულ ცოტა ხნის წინ მან 119-ე დაბადების დღეც აღნიშნა და კვლავ სიამაყით ატარებს მსოფლიო რეკორდსმენის სტატუსს. მეტიც — ამბობს, რომ მომავალ წელს 120 წლის იუბილესაც იზეიმებს და თავისივე რეკორდს გააუმჯობესებს.

დაბადების დღიდან ფოტოები ტანაკას შვილთაშვილმა, ჯუნკომ ტვიტერის საშუალებით გაავრცელა.

კეინ ტანაკა 1903 წელს დაიბადა და იაპონიის ხუთი იმპერატორის მმართველობას მოესწრო. მაგალითისთვის, იმავე წელს დაიბადა ცნობილი მწერალი ჯორჯ ორუელი, რომელიც 1950 წელს გარდაიცვალა.

ტანაკა ცხრაშვილიან ოჯახში მეშვიდე იყო, 19 წლის დაქორწინდა და ატრიის საოჯახო ბიზნესს მართავდა, როცა მისი ქმარი და უფროსი ვაჟი 1937 წელს იაპონია-ჩინეთის ომში საბრძოლველად წავიდნენ.

აღსანიშნავია, რომ ტანაკას ძალიან უყვარს შოკოლადი და გაზიანი სასმელები, განსაკუთრებით კოკა-კოლა, რის გამოც დაბადების დღეზე სპეციალურად მისთვის ჩამოსხმული და ბრენდირებული სასმელი აჩუქეს.

ფოტო: tanakakane0102 / Twitter

ტანაკა ამჟამად სპეციალიზებულ სამედიცინო დაწესებულებაში ცხოვრობს, სადაც მასზე ზრუნავენ. კორონავირუსის პანდემიის გამო ის ოჯახის წევრებსაც იშვიათად ხვდება და თავს პაზლებითა და სამაგიდო თამაშებით იქცევს.

იაპონიის ჯანდაცვის მინისტრის ცნობით, 2021 წელს ქვეყანაში ას წელს გადაცილებული 86 510 ადამიანი ცხოვრობდა.

ქვეყანაში სიცოცხლის ხანგრძლივობა ასევე რეკორდულია: ქალების საშუალო ასაკი 87,74-ს, კაცებისა კი 81,64 წელს უდრის.

ამასთან ერთად იაპონიაში შობადობის პრობლემაა: 20-დან 30 წლამდე ახალგაზრდები მთელი მოსახლეობის მხოლოდ 1%-ს შეადგენენ, რის გამოც იაპონიაში დემოგრაფიის პრობლემა მწვავედ დგას.