პირველი იანვრიდან საფრანგეთში მცხოვრები 25 წლამდე ასაკის ქალებისთვის კონტრაცეპტივები უფასო გახდა. ახალი ინიციატივა დაახლოებით 3 მილიონამდე ქალს დაეხმარება, განსაკუთრებით კი მათ, ვინც კონტრაცეპტივებს უსახსრობის გამო ვერ ყიდულობდნენ. უფასო იქნება, აგრეთვე, მასთან დაკავშირებული პროცედურებიც, მაგალითად, ყოველწლიური ვიზიტი ექიმთან.

აღსანიშნავია, რომ საფრანგეთში კონტრაცეპტივები არასრულწლოვნებისთვის აქამდეც უფასო იყო. მთავრობამ ასაკობრივი ზღვარი გაზარდა, რადგან ბოლო წლებში უსახსრობის გამო კონტრაცეპტივების ყიდვის დაბალი მაჩვენებელი დაფიქსირდა. მათი შეძენა კი განსაკუთრებით რთულია 18-25 წლის ასაკის ქალებისთვის, რომლებიც სრულწლოვნების მიღწევის გამო ამ შეღავათს კარგავენ, თუმცა ფინანსური სტაბილურობა ჯერ არ მოუპოვებიათ. მთავრობას ახალი ინიციატივა ყოველწლიურად $24, 8 მილიონი დაუჯდება.

"18-დან 25 წლამდე ქალები მოწყვლად ჯგუფს წარმოადგენენ, რადგან სრულწლოვნების მიღწევის შემდეგ კარგავენ ბევრ შეღავათს და ეკონომიკური სტაბილურობა არ აქვთ", — აცხადებენ მთავრობის წარმომადგენლები.

არასრულწლოვნებისთვის კონტრაცეპტივები ბელგიაში, გერმანიაში, ნიდერლანდებსა და ნორვეგიაში უფასოა. ბრიტანეთში კონტრაცეპტივების ნაწილი ნებისმიერი ასაკის ქალებისთვის უფასოდაა ხელმისაწვდომი.