ქართული ოცნების თავმჯდომარის, ირაკლი კობახიძის განცხადებით, მიხეილ სააკაშვილს საკმაოდ მოკრძალებული სასჯელი აქვს შეფარდებული, მიუხედავად მის მიერ ჩადენილი დანაშაულების ხარისხის.

"მიხეილ სააკაშვილი არის უმძიმესი დამნაშავე, რომელმაც უმძიმესად დანაშაულები ჩაიდინა. მას აქვს შეფარდებული საკმაოდ მოკრძალებული სასჯელი, მიუხედავად მის მიერ ჩადენილი დანაშაულების ხარისხის, ეს არის 6 წელი. ეს არის ჩვენს მიერ შეცვლილი კანონმდებლობის დამსახურება და მან უნდა მოიხადოს, ბუნებრივია, ამისთვის სასჯელი. შურისძიებას არ ნიშნავს ის, როდესაც კანონის წინაშე ადამიანი არის თანასწორი", — განაცხადა კობახიძემ პარლამენტში.

გვიან ღამით სააკაშვილის ადვოკატებმა გაავრცელეს ინფორმაცია, რომ ექსპრეზიდენტი გორის ჰოსპიტლიდან რუსთავის მე-12 დაწესებულებაში გადაიყვანეს. ოფიციალური განცხადება პენიტენციურმა სამსახურმა ინფორმაციის გავრცელებიდან 9 საათის შემდეგ გაავრცელა და დაადასტურა, რომ სააკაშვილი რუსთავის ციხეშია.

გუშინ, 29 დეკემბერს მედიაში გავრცელდა ინფორმაცია, რომ სააკაშვილის მკურნალი ექიმის ჯანმრთელობის მდგომარეობა გაუარესდა. იმავე დღეს სახალხო დამცველის წარმომადგენელმა, საბა ბრაჭველმა თქვა, რომ სააკაშვილს, ამ ეტაპზე, ექიმი არ ჰყავს.

28 დეკემბერს გორის ჰოსპიტალში სააკაშვილის მკურნალმა ექიმმა, ნინო გოგორიშვილმა ექსპრეზიდენტის ადვოკატი, ნიკა გვარამია შეცდომაში შეყვანაში დაადანაშაულა. ნიკა გვარამიამ წაიკითხა ოქმი, სადაც, მისი თქმით, ექიმი, ნინო გოგორიშვილი საუბრობს, თუ რა მოხდა 27 დეკემბერს, როდესაც სააკაშვილს გადაყვანის შესახებ აცნობეს.