ჯანდაცვის მინისტრის მოადგილის, თამარ გაბუნიას განცხადებით, ჯანდაცვის სამინისტრო 4 მიმართულებით მუშაობას და ძალიან რთულია, მინისტრს რომელიმე მიმართულებით "ღრმა ტექნიკური ექსპერტიზა" მოსთხოვონ. ასე პასუხობს ის ჯანდაცვის ახალ მინისტრზე დასმულ შეკითხვას — "მოვისმინეთ შეფასებები, რომ ჯანდაცვის მინისტრი უნდა ყოფილიყო ამ სფეროსთან პროფესიულად ახლოს, როგორ ფიქრობთ რამდენად სწორია ეს პოზიცია?".

"ჯანდაცვის სამინისტრო საქართველოში მართავს 4 დიდ მიმართულებას — ჯანდაცვას, სოციალური მიმართულება, დასაქმება, დევნილთა განსახლება. ანუ, ამ შემთხვევაში, ძალიან რთულია, მოვითხოვოთ რომელიმე მიმართულებით და ოთხივე მიმართულებით ღრმა ტექნიკური ექსპერტიზა რომელიმე მინისტრისგან.

ამდენად, მინისტრის მთავარი სიძლიერე, ამ შემთხვევაში, არის პოლიტიკური ხედვა, მენეჯმენტის გამოცდილება და უნარ-ჩვევები, ასევე, ის, რომ ასეთ დიდ უწყებას მან გაუწიოს სათანადო ხელმძღვანელობა და ვფიქრობთ, მსგავსი უნარ-ჩვევები და გამოცდილება მინისტრს ნამდვილად აქვს, ამიტომ მოლოდინები არის პოზიტიური", — აღნიშნა მან.

ჯანდაცვის ახალი მინისტრი ზურაბ აზარაშვილია. პრემიერმინისტრმა ირაკლი ღარიბაშვილმა მისი დანიშვნის შესახებ დღეს, მთავრობის სხდომის დაწყებამდე განაცხადა. აზარაშვილის წარდგენისას ღარიბაშვილმა თქვა, რომ მის მენეჯერულ უნარებში თავდაცვის მინისტრობის პერიოდში დარწმუნდა. აზარაშვილმა ჯანდაცვაში სწორედ თავდაცვის სფეროდან გადაინაცვლა. აქამდე იგი თავდაცვის მინისტრის მოადგილის პოსტს იკავებდა.

გაიგეთ მეტი: