"კანადა მხარს უჭერს ამერიკის შეერთებული შტატების შეზღუდულ, თუმცა, მიზანმიმართულ ქმედებას, რათა ასადის რეჟიმს, უდანაშაულო მოქალაქეების წინააღმდეგ, ქიმიური იარაღის გამოყენების უნარი წაერთვას", - ამის შესახებ კანადის პრემიერმინისტრი ჯასტინ ტრიუდო განცხადებას ავრცელებს.

კანადის პრემიერის თქმით, სირიაში მომხდარი, რეაგირების გარეშე არ უნდა დარჩეს:

"დაუშვებელია, ასეთი შემზარავი თავდასხმები დაუსჯელი დარჩეს. ამ კვირაში, სამხრეთ იდლიბზე განხორციელებული თავდასხმა და სირიელების ტანჯვა არის ომის დანაშაული და ეს ყოვლად მიუღებელია. კანადა გმობს ყველას, ვინც ქიმიურ იარაღს იყენებს და გააგრძელებს დიპლომატიურ ძალისხმევას სირიის კრიზისის გადასაჭრელად".

ამერიკის შეერთებულმა შტატებმა სირიაში სამოქალაქო ომის დაწყებიდან ექვსი წლის შემდეგ პირველად, 7 აპრილს, საჰაერო იერიში მიიტანა სირიის მთავრობის სამხედრო ავიაბაზაზე ჰომსის პროვინციაში.

კანადის გარდა, ავსტრალიამ, თურქეთმა, იაპონიამ, საუდის არაბეთმა, ისრაელმა და დიდმა ბრიტანეთმა მხარდაჭერა გამოუცხადეს აშშ-ს ასადის რეჟიმის წინააღმდეგ გადადგმულ ნაბიჯში.