მადაგასკარელი მინისტრი, რომელიც ვერტმფრენის ჩამოვარდნის შემდეგ ორი გადარჩენილიდან ერთ-ერთია, 12 საათის განმავლობაში ცურავდა, სანამ სამშვიდობოზე გავიდოდა.

ქვეყნის სახელმწიფო პოლიციის მდივანი, სერჟ ჟელი თავის ოფიცრებთან ერთად სამაშველო მისიით კუნძულის ჩრდილოაღმოსავლეთით, გემის ჩაძირვის შემდეგ გადარჩენილებთან მიემგზავრებოდა, თუმცა, ჯერჯერობით უცნობი მიზეზით, ვერტმფრენი ჩამოვარდა. ჟელმა და ერთ-ერთმა ოფიცერმა ნაპირამდე ცურვით მიაღწიეს, თუმცა, ორ მგზავრს ჯერ ისევ ეძებენ.

ვიდეოში, რომელიც ინტერნეტში გავრცელდა, 57 წლის ჟელი საკაცეზე ჯერ ისევ თავის უნიფორმაში გამოწყობილი და დაღლილი წევს, თუმცა, მაყურებელს ახარებს, რომ ყველაფრის მიუხედავად, გადარჩა და 24-საათიანი პაუზის შემდეგ სამუშაოზე დაბრუნება შეუძლია.

"ჩემი სიკვდილის დრო ჯერ არ დამდგარა", — ამბობს გენერალი, რომელიც გათოშილია, თუმცა, დაშავებები არ აღენიშნება.

როგორც ცნობილი გახდა, ჟელმა ცურვისთვის ვერტმფრენის ერთ-ერთი სავარძელი გამოიყენა, თუმცა, თავადაც ფიზიკურად მომზადებული ყოფილა.

"ყოველთვის სპორტული და ენერგიული იყო და მინისტრიც ასეთივე დარჩა, 30 წლისას ჰგავს", — აღნიშნავს პოლიციის უფროსი, ზაფისამბატრა რავუავი, — "რკინის ნერვები აქვს".

რაც შეეხება გემის ჩაძირვას, უბედურ შემთხვევას ამჟამინდელი ინფორმაციით 85 ადამიანის სიცოცხლე ემსხვერპლა; 50 ადამიანის გადარჩენა მოხერხდა, სამს კი კვლავ ეძებენ. როგორც ცნობილია, გემი სატვირთო იყო და მგზავრებისთვის არ ყოფილა განკუთვნილი. გადატვირთული ხომალდის ძრავი კი შემდეგ დაიტბორა.