კრის მარტინის განცხადების თანახმად, Coldplay ახალი სიმღერების წერას 2025 წლიდან შეწყვეტს. Coldplay-ის მომღერალმა ეს ამბავი BBC-სთან ინტერვიუში დაადასტურა.

"ზუსტად ვიცი, რომ ჯგუფის ბოლო ჩანაწერი 2025 წელს გამოვა და ვფიქრობ, რომ ამის შემდეგ რამდენიმე ტურნე გვექნება. არ გამოვრიცხავ, რომ გუნდის წევრებმა ვითანამშრომლოთ, მაგრამ Coldplay-ის კატალოგი ასე დასრულდება", — ამბობს მარტინი.

ჯგუფმა მე-9 ალბომი, სახელად Music Of The Spheres, ამ წლის დასაწყისში გამოუშვა. "ჩვენ ვაპირებთ რომ სულ 12 ალბომი გამოვუშვათ. ეს საქმე ძალიან მიყვარს, თუმცა ინტენსიურ მუშაობასაც მოითხოვს. ამასთანავე, ვგრძნობ, რომ ეს გამოწვევა სასრულია და არ ვიცი, სამომავლოდ რას გავაკეთებთ, თუმცა ზუსტად ვიცი, ალბომების თვალსაზრისით რა უნდა გავაკეთოთ", — აცხადებდა მარტინი ოქტომბერში და სავარაუდოდ, ბოლოდროინდელ გადაწყვეტილებაზე მიგვანიშნებდა.

თვის დასაწყისში Coldplay-მ ორი კონცერტი გამოტოვა, რადგან მათი ადმინისტრაციული გუნდის ორ წევრს COVID-19 დაუდასტურდა.

"ვუგზავნით ჩვენს სიყვარულს ყველა კოვიდინფიცირებულს და სწრაფ გამოჯანმრთელებას ვუსურვებთ", — ვკითხულობთ Coldplays-ის მიერ გამოქვეყნებულ პოსტში.

ასევე იხილეთ: