ბრიტანულმა მუსიკალურმა ჯგუფმა, Coldplay, წლების განმავლობაში უამრავი დაუვიწყარი სანახაობა შესთავაზა გულშემატკივრებს, თუმცა, ამჯერად სამყაროდან გასვლა გადაწყვიტა, ამ ფრაზის პირდაპირი მნიშვნელობით.

6 მაისს ბენდის ახალი სიმღერის — Higher Power-ის — პრემიერა, სანამ ის ციფრულ პლატფორმებზე გამოჩნდებოდა, საგანგებოდ შედგა საერთაშორისო კოსმოსურ სადგურზე მომუშავე ფრანგი ასტრონავტის, ტომა პესკესთვის. ამდენად, კოსმოსში მყოფი პესკე პირველი იყო, ვინც კომპოზიციას მოუსმინა.

ასტრონავტს ვიდეოზარის საშუალებით ბენდის სოლისტი, კრის მარტინი, გაესაუბრა.

"ამჟამად არ შეგვიძლია, რომ დედამიწაზე ვინმესთვის დავუკრათ, ამიტომ, ვიფიქრეთ, მხოლოდ შენ მოგასმენინებდით", — უთხრა მარტინმა პესკეს, — "ერთი ადამიანისთვის გამართულ კონცერტს ჰგავს".

საუბრის დროს მუსიკალური ჯგუფის წევრი შეეხო კოსმოსის თემასაც და აღნიშნა, რომ, მისი აზრით, ადამიანებისთვის სხვა პლანეტების მონახულება და შესწავლა "უფრო უსაფრთხოა", რადგან მათ დედამიწაზე არსებულის ყურების ეშინიათ. ამგვარად, მარტინმა სიმღერის მნიშვნელობის ახსნაც სცადა.

"ეს მართლაც ერთი დიდი ალეგორიაა", — აღნიშნა მომღერალმა, — "სიმღერა ჩვენს თავში ასტრონავტის პოვნაზეა; იმ ადამიანისაზე, რომელსაც საოცარი რაღაცების ჩადენა შეუძლია".

ცნობილი შვედი პროდიუსერის, მაქს მარტინის, შექმნილი კომპოზიცია, რომელსაც Coldplay-სთვის დამახასიათებელი ჰიმნის ჟღერადობა აქვს, კოსმოსური ატმოსფეროთია გაჯერებული და მსმენელს მართლაც უკიდეგანო სივრცეში აგრძნობინებს თავს. ის მოუწოდებს, მათი შესაძლებლობები და მიზანი აღმოაჩინონ.

იუთუბზე გამოქვეყნებულ სიმღერის ვიდეოში, თემატურად, მოცეკვავე უცხოპლანეტელების ჰოლოგრამებიც ჩანან.

Higher Power ბენდის მეცხრე, ჯერ კიდევ უსახელო სტუდიურ ალბომში შემავალი სიმღერაა. კომპოზიციის ლაივ-ვერსია Coldplay-მ უკვე შეასრულა American Idol-ში. ახალი სინგლით გახსნის ბენდი 2021 წლის Brit Awards-საც.