ქართველი მუსიკოსები — ორი მომღერალი და ერთი ჯგუფი — ევროპის წლის 100 საუკეთესო ინდი ხელოვანის კონკურსზე არიან წარდგენილები. Tamada, ერეკლე გეწაძე და ჯგუფი ცირკუს მირკუსი პრესტიჟულ რეიტინგში მოხვედრას ეცდებიან. ინფორმაციას ამის შესახებ მუსიკის ქართული გამომცემელი GMI Rights Management ავრცელებს.

"წელს გვქონდა პატივი IMPALA-სთან კოლაბორაციით ჩავრთულიყავით კანდიდატების შერჩევის პროცესში, რომლებიც ნომინირებულები იქნებოდნენ ევროპის წლის 100 საუკეთესო ინდი არტისტის კონკურსში მონაწილეობის მისაღებად", — წერია განცხადებაში.

GMI Rights Management-ის გავრცელებული ინფორმაციის მიხედვით, კონკურსში მონაწილეობის მისაღებად აუცილებელი პირობა იყო, პოტენციურ ნომინანტს მიმდინარე წლის განმავლობაში რაიმე აქტივობა ჰქონოდა განხორციელებული. ამასთან, მას უნდა დაეკმაყოფილებინა სხვა მნიშვნელოვანი კრიტერიუმებიც, როგორიცაა ინოვაციურობა, შემოქმედებითობა და კომერციული წარმატება.

"Tamada-ის 2021 წლის შემოქმედება შეფასდა, როგორც მაღალი ორიგინალურობისა და იდენტობის მქონე შემოქმედება. Erekle Getsadze-მ გაიმარჯვა ELECTRONAUTS-ს მთავარ ნომინაციაში, ელექტრონავტი XII, ხოლო Circus Mircus-მა გაიმარჯვა ევროვიზიის შიდა კონკურსში და იბრძოლებს საერთაშორისო დონეზე საქართველოს სახელით".

აღსანიშნავია, რომ IMPALA-ის ყურადღების ცენტრში რამდენიმე წლის წინ ცნობილი ქართული ჰიპ-ჰოპ ჟანრის დუეტი KayaKata-ც აღმოჩნდა, რომლის ალბომიც წლის საუკეთესო ალბომის დაჯილდოებაზე 22 ნომინანტს შორის მოხვდა.

რაც შეეხება GMI-ის, ეს პირველი ქართული მუსიკალური გამომცემლობა და ლეიბლია. 2018 წლიდან დღემდე GMI-მ მოახერხა გაეციფრულებინა 290 ავტორის 4000-ზე მეტი ფონოგრამა, რომლებიც ხელმისაწვდომია ისეთ პლატფორმებზე, როგორებიც არიან YouTube, Spotify, Apple Music, Deezer, Amazon და სხვა. 2018 წელსვე ლეიბლი საქართველოს ისტორიაში პირველი კომპანია გახდა, რომელიც დამოუკიდებელ მუსიკალურ გამომცემელთა ფორუმში გაწევრდა.

დღესდღეობით კომპანია იცავს და მართავს ისეთი ავტორების შემოქმედებას, როგორებიც არიან გია ყანჩელი, ჯანსუღ კახიძე, რევაზ ლაღიძე, გოგი ცაბაძე, ნიაზ დიასამიძე, ალექსანდრე ბასილაია, ბიძინა კვერნაძე, ჯემალ სეფიაშვილი, ვატო კახიძე, ირინა სანიკიძე და სხვა მრავალი. GMI 2019 წლიდან საქართველოში წარმოადგენს ისეთ გიგანტ მუსიკალურ გამომცემელს, როგორიცაა Universal Music Publishing Group.