ექსპრეზიდენტ მიხეილ სააკაშვილის ინფორმაციით, საქართველოს ხელისუფლების მოთხოვნით, ბერლინში გენშტაბის ყოფილი უფროსი, გენერალი გიორგი კალანდაძე დააკავეს.

"ის არის 2008 წლის ომის გმირი. მაშინ მე-4 ბრიგადის ჯგუფმა, რომელსაც ის მეთაურობდა, შეაჩერა რუსეთის ტანკების მოწინავე დამრტყმელი ძალა და ამ ბრძოლის დროს მძიმედ დაიჭრა რუსეთის 58-ე არმიის მეთაური გენერალი ხრულოვი. უკრაინაში ომის დაწყებისთანავე გიგი აქტიურად ჩაერთო საბრძოლო მოქმედებებში. მას მნიშვნელოვანი წვლილი აქვს გაღებული მტრის შეტევის შეჩერებაში აღმოსავლეთის ფრონტზე. სწორედ ამის მერე საქმეც აღიძრა. რამდენადაც ვიცი, გენერალი კალანდაძე უკრაინის მოქალაქეა და ასევე, მას უკავია თანამდებობა უკრაინის ეროვნულ გვარდიაში", — წერს სააკაშვილი Facebook-ზე.

მისივე განცხადებით, "სირცხვილია, რომ საქართველოს ხელისუფლება სწორედ რუსეთის მთავარ მტრებს უქმნის პრობლემებს მსოფლიოს მასშტაბით".

"დარწმუნებული ვარ, გერმანიის პროკურატურა და სასამართლო სწრაფად გაერკვევიან დაკავების მოთხოვნის დაუსაბუთებლობაში და გიგი ძალიან სწრაფად გათავისუფლდება და მას ბოდიშსაც მოუხდიან. გერმანიის სასამართლო მურუსიძის კანტორა არავის ეგონოს. უბრალოდ, საქართველოს ხელისუფლება მორიგ ჯერზე იჭრის თავს!", — ამბობს სააკაშვილი.

გიორგი კალანდაძის შესახებ ოფიციალური ინფორმაცია ამ დრომდე არ გაუვრცელებიათ შესაბამის სტრუქტურებს საქართველოში. On.ge უკვე დაუკავშირდა პროკურატურას, საგარეო და შინაგან საქმეთა სამინისტროებს და მათ პასუხს მიღებისთანავე შემოგთავაზებთ.

გიორგი კალანდაძე 2012 წელს, პირადად თეა წულუკიანმა დააკავა, რომელიც მაშინ იუსტიციის მინისტრი იყო. ამ დროს კალანდაძეს გენერალური შტაბის უფროსის თანამდებობა ეკავა. მას თავდაცვის ყოფილ მინისტრ, ბაჩო ახალაიასა და უწყების სხვა მაღალჩინოსნებთან ერთად უფლებამოსილების გადამეტებას ედავებოდნენ. სასამართლომ კალანდაძეს აღკვეთის ღონისძიების სახით გირაო შეუფარდა, რის შედეგადაც ის გათავისუფლდა. 2013 წელს კი კალანდაძე, ახალაია და სხვა ბრალდებულების ნაწილი სასამართლომ ამ საქმეზე უდანაშაულოდ ცნო.