იუსტიციის მინისტრის, რატი ბრეგაძის ინფორმაციით, ე.წ. დეპორტირებულების საქმეზე რუსეთს კომპენსაციის გადახდის ვადად ევროპის საბჭოს მინისტრთა კომიტეტმა ვადა მიმდინარე წლის ბოლომდე დაუდგინა. როგორც მინისტრი განმარტავს, სწორედ მინისტრთა საბჭოა სტრასბურგის სასამართლოს გადაწყვეტილებების აღსრულებაზე ზედამხედველი ორგანო. ბრეგაძე ამბობს, რომ ქართული მხარის თხოვნით საბჭო ამ საქმეს წელიწადში 4-ჯერ იხილავდა.

"იუსტიციის სამინისტროს აქტიურობის შედეგად, რუსეთი დათანხმდა, კომპენსაცია ჩარიცხოს ევროპის საბჭოს ანგარიშზე. ამ მიზნით ევროპის საბჭოს გენერალურმა მდივანმა და საქართველოს ელჩმა მემორანდუმს მოაწერეს ხელი. მინისტრთა კომიტეტმა რუსეთს ხელმოწერისა და თანხის გადახდისთვის ვადა 2021 წლის დეკემბრის ბოლომდე დაუდგინა.

თუ დეკემბერში რუსეთი ხელს არ მოაწერს, ამ შემთხვევაში დაიწყება ვალდებულების დარღვევის პროცედურები, რაც შეიძლება დასრულდეს როგორც ხმის უფლების წართმევით, ან გარიცხვით და შემდგომში საერთაშორისო სამართალში აღსრულების მექანიზმებზე, ბუნებრივია, მოგეხსენებათ, რომ ეს არ არის, რა თქმა უნდა, მარტივი საკითხი, თუმცა მიღწევადია და ჩვენ მაქსიმალურად გამოვიყენებთ ყველა იმ მექანიზმს, რაც თეორიულად მაინც ჩვენს ხელთ შეიძლება იყოს", — განაცხადა რატი ბრეგაძემ.

ადამიანის უფლებათა ევროპული სასამართლოს დიდმა პალატამ ე.წ. დეპორტირებულების საქმეზე გადაწყვეტილება 2019 წლის 31 იანვარს გამოიტანა. სასამართლომ რუსეთს 10 მილიონი ევროს ოდენობის მორალური კომპენსაციის გადახდა დააკისრა.