ბოლო შვიდი დღის მონაცემებით, საქართელოში დისტანციურ სწავლებაზე 89 სკოლა და 398 კლასი იმყოფება. განათლების სამინისტროს ცნობით, ბოლო ორი კვირის განმავლობაში დისტანციურ სწავლებაზე გადასული სკოლების რიცხვი თანდათანობით იკლებს. მათივე განცხადებით, ამ ეტაპისთვის აცრილია მასწავლებელთა და სკოლის ადმინისტრაციის წარმომადგენელთა 71,7%.

"საქართველოს მასშტაბით დისტანციურ სწავლებაზე იმყოფება რისკის ჯგუფის 110 მასწავლებელი. გასული კვირის მონაცემებთან შედარებით შემცირებულია ინფიცირებულ პედაგოგთა რიცხვი. ბოლო შვიდი დღის მონაცემებით, კორონავირუსი მასწავლებლების 0,6%-ს დაუდასტურდა, ხოლო მოსწავლეების — 0,3%-ს", — აცხადებენ სამინისტროში.

უწყებაში განმარტავენ, სკოლებში Covid-19-ის ვირუსის პრევენციის მიზნით სხვადასხვა მიმართულებით აქტიურად მუშაობენ.

12 დეკემბრის მონაცემებით, საქართველოში კორონავირუსის 2 922 ახალი შემთხვევა დადასტურდა, გამოჯანმრთელდა — 4 999, ხოლო გარდაიცვალა — 36 ადამიანი.

ქვეყანაში Covid-19-ის პანდემიის გავრცელებიდან დღემდე დადასტურებული შემთხვევების საერთო რაოდენობა შეადგენს 889 286-ს, მათგან გამოჯანმრთელდა — 832 675, ხოლო ვირუსს ჯამში ემსხვერპლა 12 731 ადამიანი.