დროას ლიდერის ელენე ხოშტარია ეკატერინე ტიკარაძის ჯანდაცვის მინისტრის თანამდებობიდან გადადგომაზე აცხადებს, რომ ქართული ოცნების დამფუძნებელი ბიძინა ივანიშვილი ხალხს აპამპულავებს და ეს ქვეყნისთვის შეურაცხმყოფელია.

"იმდენად შეურაცხმყოფელია ჩემთვის, როგორც პოლიტიკოსისთვის, როგორც მოქალაქისთვის, რომ მე უნდა ვიმარჩიელო მორიგ ჯერზე, რა მოიხარშა ბიძინა ივანიშვილის თავში. თან ისეთი წარმოდგენა მაქვს, რომ რაღაცა მარიონეტებივით ამ ადამიანებს ხომ, ჩემთვის ამ ხალხის უპატივცემულობაც არის, მნიშვნელობა არ აქვს, ახლა რომელ ბანაკში ვართ, პარლამენტარების მიმართაც მქონია ეს განცდა, რომ ისე აპამპულავებს ამ ხალხს. ხან ერთს აჯანყებს, ხან მეორეს აჩხუბებს, ხან დაატაკებს და ეს მთლიანად ქვეყნისთვის შეურაცხმყოფელია და ამიტომ პროტესტი მაქვს ხოლმე ამ კულუარულ ანალიზში შესვლის. და რაც მთავარია პრაგმატულადაც, ჩვენ არ უნდა გადავეწყოთ ამ დღის წესრიგზე, ამ თამაშებში არ უნდა შევიდეთ, ჩვენ გვაქვს ჩვენი ძალიან მკაფიო დღის წესრიგი", — განაცხადა ხოშტარიამ ფორმულას ეთერში.

მისივე თქმით, ჯანდაცვის მინისტრის წასვლით არავის არ აქვს განცდა, რომ რამე შეიცვლება. მან, ასევე, აღნიშნა, რომ ეს გადადგომა შიდა კულუარულ გადაწყვეტილებას უკავშირდება.

"რომ ვუსმენდი, ამის განცდა მქონდა, რამდენად შევეჩვიეთ ჩვენ ამ არასწორი, არსებითად მახინჯი მართვის სისტემას, რომ აბსოლუტურად არავის არ აქვს განცდა, რომ ჯანდაცვის მინისტრი მიდის, არც განცდა, არც განცხადება კეთდება ამაზე რომ ჯანდაცვის მინისტრი მიდის და არც ალბათ, იმედი, რომ რამე შეიცვლება. რომ ეს რამე უკავშირდებოდეს, ვთქვათ კოვიდის მართვას. კოვიდის მართვას რომ უკავშირდებოდეს, ალბათ, მთელი მთავრობა უნდა გარბოდეს პირდაპირი გაგებით. მაგრამ ჩვენ ყველამ ვიცით და ამაზე დროსაც არ დავხარჯავთ, რომ ეს უკავშირდება რაღაც შიდა კულუარულ. ჩვენ ახლა ვარკვევთ ბიძინას ფრთა არის, თუ რომელი ფრთა არის და ეს ფრთა სად გადავიდა და სად გადმოვიდა", — ამბობს ის.

ეკატერინე ტიკარაძემ ჯანდაცვის მინისტრის თანამდებობა დღეს, 9 დეკემბერს დატოვა. ტიკარაძემ თავისი სამწლიანი მოღვაწეობა შეაფასა, ყველას მადლობა გადაუხადა და განაცხადა, რომ კონსულტაციების შემდეგ საქმიანობის პარტიის პოლიტსაბჭოში გაგრძელება მიიჩნია სწორად. მინისტრს სიტყვა გადადგომა არ უხსენებია, არც ჟურნალისტების კითხვებს უპასუხა, ამიტომ მისი გადადგომის დაზუსტება უწყების პრესამსახურში გახდა საჭირო.