ხვალ, 10 დეკემბერს, მოსკოვში 3+3 ფორმატის პირველი შეხვედრა გაიმართება, რომელსაც საქართველო არ ესწრება. ამის შესახებ ინფორმაციას საგარეო საქმეთა სამინისტრო ადასტურებს. მათი თქმით, ფორმატში მონაწილეობა არ განიხილება.

"საგარეო საქმეთა სამინისტრომ 3+3 რეგიონული თანამშრომლობის ინიციატივასთან დაკავშირებით არაერთხელ დააფიქსირა მკაფიო პოზიცია, მათ შორის საგარეო საქმეთა მინისტრმაც ისაუბრა ამ საკითხზე ბოლო საპარლამენტო მოსმენაზე. ჩვენ არ განვიხილავთ აღნიშნულ ფორმატში მონაწილეობას და შესაბამისად მ.წ. 10 დეკემბერს დაგეგმილ შეხვედრაზე საქართველო არ იქნება წარმოდგენილი", — აცხადებს სამინისტრო.

3+3 ფორმატი თურქეთს, ირანს, რუსეთს, აზერბაიჯანს, სომხეთსა და საქართველოს შორის რეგიონული ფორმატის თანამშრომლობას გულისხმობს. 7 ოქტომბერს საგარეო საქმეთა მინისტრმა, დავით ზალკალიანმა განაცხადა, რომ "ძალიან ძნელია დაჯდე ამ ფორმატში" რუსეთთან ერთად ოკუპაციის პირობებში. თუმცა, აღნიშნა ისიც, რომ აუცილებელია, საქართველო ჩართული იყოს ყველა მნიშვნელოვან რეგიონულ პროექტში, მაგრამ "არა სახელმწიფო ინტერესების და ოკუპანტთან რაღაცა დათმობის ხარჯზე". მინისტრის ნათქვამმა კრიტიკა გამოიწვია. პასუხად საგარეო საქმეთა სამინისტრომ განაცხადა, რომ ზალკალიანის ინტერვიუს არასწორი ინტერპრეტაცია მოჰყვა და არ განიხილავენ ე.წ. 3+3 ფორმატში მონაწილეობას რუსეთთან ერთად.