ახალქალაქის, კუმურდოისა და კარის მიტროპოლიტმა ნიკოლოზმა ექსპრეზიდენტთან, მიხეილ სააკაშვილთან შეხვედრის შემდეგ განაცხადა, რომ მას ზეთი აცხო. მეუფე ამბობს, რომ ამით როგორც ადამიანის განკურნება, ასევე, დავიწყებული ცოდვების მიტევებაც შესაძლებელია.

"გორში ჩამოვედი წინასწარი შეთანხმების საფუძველზე, მისი თხოვნა იყო, რომ მე მას შევუსრულე საიდუმლოება. ახალი აღთქმის 7 საიდუმლოება არსებობს და მეექვსე საიდუმლოება, რომელიც მას არ ჰქონდა მიღებული, ეს არის ზეთის კურთხევის საიდუმლო, ასე ჰქვია. შემიძლია, დეტალურად მოგიყვეთ როგორ არის.

ერთი, შემიძლია გითხრათ, რომ ეს არის ლოცვები, მე პირადად 2 საათი მჭირდება, რომ ხმამაღალი კითხვისას მთლიანად შევასრულო. 7-ჯერ ზეთისცხება, ასე უფრო არის ცნობილი ხალხისთვის. აი, 7-ჯერ ზეთისცხების საიდუმლოება შევუსრულე, რომლის დროსაც ადამიანის ფიზიკური მკურნალობაც და განკურნებაც ხდება და კიდევ ამბობენ, რომ დავიწყებული ცოდვებიც მიეტევება ასეთ დროს ადამიანს", — თქვა მან.

მის მიმართ საპატრიარქოს კრიტიკაზე მიტროპოლიტი ამბობს, რომ ის არა სააკაშვილთან შეხვედრის, არამედ შემდეგ გაკეთებული კომენტარების გამო გააკრიტიკეს. მისივე თქმით, ის არაა ვალდებული ყოველ სამღვდელო მოქმედებაზე ლოცვ-კურთხევა აიღოს. მეუფე დასძენს, რომ მან პატრიარქთან თავის დროზე სააკაშვილის ზიარება უკვე შეათანხმა, რაც იმას ნიშნავს, რომ სხვა წესების შესრულების უფლებაც აქვს.

რაც შეეხება სააკაშვილის ჯანმრთელობის მდგომარეობას, სასულიერო პირი აღნიშნავს, რომ ექსპრეზიდენტი წინა ნახვებთან შედარებით, დასუსტებული მოეჩვენება. ამასთან, მეუფე ნიკოლოზის თქმით, უფრო და უფრო რწმუნდება, რომ "სააკაშვილი მართლმადიდებელი ქრისტიანია".

"რაც დრო გადის, უფრო და უფრო მეტად ვრწმუნდები, რომ მიხეილ სააკაშვილი არის მართმლმადიდებელი ქრისტიანი, ვერაფერს სხვას ვერ გეტყვით, აბსოლუტურად. აღსარება თქვა, ეზიარა, ეს ხანგრძლივი ლოცვები მოისმინა და 7-ჯერ იცხო ზეთი. ახალი აღთქმის 7 საიდუმლოდან 6 უკვე მასზე შესრულებულია, მე-7 ცოტა ადრეა", — ამბობს ის.

10 ნოემბერს საპატრიარქომ მეუფე ნიკოლოზი ექსპრეზიდენტზე გაკეთებული განცხადებების გამო გააკრიტიკა. მათი თქმით, მიტროპოლიტმა სააკაშვილის შიმშილობა მარხვასთან გააიგივა, რაც მარხვის არსის დაკნინებაა და დასძინეს, რომ იმედი აქვთ, მეუფე მსგავს "გადაცდომებს" მომავალში აღარ დაუშვებს. 15 ნოემბერს საპატრიარქოს საზოგადოებასთან ურთიერთობის ხელმძღვანელმა, ანდრია ჯაღმაიძემ მეუფე ნიკოლოზის კრიტიკაზე თქვა, რომ პატრიარქის შეუთანხმებლად საპატრიარქო არცერთ განცხადებას არ აკეთებს.

მეუფე ნიკოლოზმა ექსპრეზიდენტი პენიტენციურ დაწესებულებაში ორჯერ მოინახულა, პირველად 13 ოქტომბერს, მეორედ კი 8 ნოემბერს. პირველი ვიზიტის შემდეგ მეუფემ განაცხადა, რომ მესამე პრეზიდენტის ციხიდან გამოსვლის და ქვეყნის ისტორიაში ახალი ეპოქის დაწყების იმედი აქვს. მეორე ვიზიტის შემდეგ მან თქვა, რომ სააკაშვილი აზიარა და მისგან აღსარება ჩაიბარა. ფაჩუაშვილის თქმით, ეს არის ისტორიული მოვლენა. ამასთანავე, მან აღნიშნა, რომ ზიარების შესახებ პატრიარქს შეუთანხმდა და ეს მისი კურთხევით მოხდა