საპატრიარქო ახალქალაქის, კუმურდოსა და კარის მიტროპოლიტი ნიკოლოზის მიერ მიხეილ სააკაშვილთან დაკავშირებით გაკეთებულ განცხადებებს ეხმიანება და ამბობს, რომ იმედი აქვთ, მეუფე ასეთ გადაცდომებს მომავალში აღარ დაუშვებს.

"ვწუხვართ, რომ მღვდელმთავრის ბოლოდროინდელმა პირადმა შეხედულებებმა ურთიერთშენდობის გზაზე ნაბიჯების გადადგმის შესაძლებლობა კიდევ უფრო გაართულა.

საერთოდ კი მეუფე ნიკოლოზს მრავალი სათნო საქმე აქვს აღსრულებული და ყოველთვის იყო აქტიური. ვიმედოვნებთ, ასეთ გადაცდომებს მომავალში აღარ დაუშვებს და ეკლესიისა და ხალხისათვის არაერთ სასიკეთო ნაბიჯს გადადგამს",— აცხადებენ ისინი.

მათი თქმით, რადგან უპირობო ან გარკვეული პირობით შერიგებაზე და განსაკუთრებით, ციხიდან გათავისუფლებაზე საუბარი ძირითადად ექსპრეზიდენტთან მიმართებით გაჟღერდა, მიუხედავად მაღალი სამოქალაქო ინტერესისა, ობიექტურობიდან გამომდინარე, ამის სურვილი სხვა პატიმრებთან მიმართებითაც უნდა გამოთქმულიყო.

"საეკლესიო სწავლებითაც შერიგება (როგორც ადამიანებს, ისე ღმერთსა და ადამიანს შორის) შეუძლებელია ცოდვათა აღიარების, სათანადო სინანულისა და შესაბამისი ეპიტიმიების აღსრულების გარეშე.

ხოლო რადგან უპირობო ან გარკვეული პირობით შერიგებაზე და, განსაკუთრებით, ციხიდან გათავისუფლებაზე საუბარი ძირითადად მესამე პრეზიდენტთან მიმართებაში გაჟღერდა, მიუხედავად მაღალი სამოქალაქო ინტერესისა, ობიექტურობიდან გამომიდინარე, ამის სურვილი მაშინ სხვა პატიმრებთან მიმართებაშიც უნდა გამოთქმულიყო

ეს დამოკიდებულება რომ არ იკითხებოდა მიტროპოლიტის განცხადებაში, სწორედ ამან შექმნა საზოგადოებაში უარყოფითი განწყობა", — აცხადებს საპატრიარქო.

ისინი ეხმაურებიან 8 ნოემბერს გაკეთებულ კომენტარსაც და ამბობენ, რომ "მეუფე ნიკოლოზმა მოქალაქეთა სამართლიანი უკმაყოფილება გამოიწვია, პირველ რიგში, ქრისტიანული სწავლების კონტექსტში მოხმობილი შეუსაბამო შედარებებით".

"მან ხაზგასმით აღნიშნა ისიც, რომ ბატონმა მიხეილ სააკაშვილმა 40 დღე მშრალად იმარხულა, რითაც დიდი მსხვერპლი გაიღო ქვეყნის გაძლიერებისათვის და იმისათვის, რომ სიძულვილის ენა დავივიწყოთ. ამ ღვაწლით კი ყველაფერი შეინანა.

პრეზიდენტისა და მისი მომხრეებისაგან კი ყველა ინფორმირებულია, რომ იგი შიმშილობს პროტესტის ნიშნად, უსამართლოდ მიიჩნევს მის დაკავებას და თავს დამნაშავედ არ სცნობს.

საეკლესიო მარხვა არის სინანულის აქტი, რომელიც აღესრულება ცოდვათა მონანიებისა და შენდობის სასოებით ... და საერთო არაფერი აქვს უსამართლო მოპყრობის მოტივით განხორცილებულ ისეთ საპროტესტო ფორმასთან, სადაც მოშიმშილე შესაძლო მძიმე შედეგის პასუხისმგებლობას სხვას აკისრებს.

ამიტომაც, პოლიტიკური მოტივებით განპირობებული შიმშილობის (მითუმეტეს, რაციონი არასამარხოცაა) გაიგივება 40 დღიან მშრალ მარხვასთან, მარხვის არსის დაკნინებაა", — ამბობს საპატრიარქო.

საპატრიარქო, ასევე, ამტკიცებს, რომ შეცდომები დაუშვეს მასმედიის წარმომადგენლებმა და საერო პირებმაც, თუმცა მხოლოდ ერთმანეთის დადანაშაულება და ლანძღვა საქართველოს სიკეთეს არ მოუტანს.

"არ შეიძლება ორიოდე სიტყვა არ ვთქვათ, იმ შეცდომებზე, რომელიც მასმედიისაგან და საერო პირთაგან არის დაშვებული,- მხოლოდ ერთმანეთის დადანაშაულება და ლანძღვა საქართველოს სიკეთეს არ მოუტანს. მოქალაქეთა პოლარიზების ხელშეწყობა და მისი გაღრმავება ქვეყნის წინაშე მძიმე დანაშაულია...

კიდევ ერთხელ მივმართავთ სასულიერო პირებს, მრევლს და მათ, ვისთვისაც ძვირფასია სამშობლო, კარგად გააცნობიერონ არსებული ვითარება და თავი შეიკავონ უხეში და დამამცირებელი ურთიერთმიმართვებისაგან. პოზიციის დაფიქსირება ყოველთვის შეიძლება, ოღონდ ეს არ უნდა ისახავდეს მიზნად სხვათა შეურაცხყოფას, არამედ,- სიმართლის ობიექტურად წარმოჩენას.

ამ რთულ ვითარებაში თითოეულ ჩვენგანს ღმერთმა შეაძლებინოს ისეთი ნაბიჯების გადადგმა, რაც რეალურად ხელს შეუწყობს სამოქალაქო მშვიდობასა და შერიგებას", — ამბობენ ისინი.

მათივე თქმით, განსაცდელში მყოფი ქრისტიანისგან ზიარების მიღების სურვილი სწორია და ამ მიზნით პატიმართან პატრიარქის ნებართვით შედიან, თუმცა აღსარება იძლევა თუ არა ზიარების შესაძლებლობას, ეს უშუალოდ სასულიერო პირის გადასაწყვეტია, ამდენად ზიარება მის სამოძღვრო პასუხისმგებლობას წარმოადგენს.

მეუფე ნიკოლოზმა ექსპრეზიდენტი პენიტენციურ დაწესებულებაში ორჯერ მოინახულა, პირველად 13 ოქტომბერს, მეორედ კი 8 ნოემბერს. პირველი ვიზიტის შემდეგ მეუფემ განაცხადა, რომ მესამე პრეზიდენტის ციხიდან გამოსვლის და ქვეყნის ისტორიაში ახალი ეპოქის დაწყების იმედი აქვს. მეორე ვიზიტის შემდეგ მან თქვა, რომ სააკაშვილი აზიარა და მისგან აღსარება ჩაიბარა. ფაჩუაშვილის თქმით, ეს არის ისტორიული მოვლენა. ამასთანავე, მან აღნიშნა, რომ ზიარების შესახებ პატრიარქს შეუთანხმდა და ეს მისი კურთხევით მოხდა.