შრომის ინსპექცია ღამის კლუბებს მოუწდებს, რომ "დადგენილებით აკრძალული საქმიანობები" არ განახორციელონ. მათი განცხადებით, წინააღმდეგ შემთხვევაში ობიექტებს დააჯარიმებენ ან დალუქავენ. ამის შესახებ ისნპექცია განცხადებას ავრცელებს.

როგორც განცხადებაშია აღნიშნული, მას შემდეგ, რაც პირველი დეკემბრიდან საქართველოში მწვანე პასპორტები ამოქმედდა, შრომის ინსპექციამ სხვადასხვა ბიზნეს სექტორის წარმომადგენლებთან, მათ შორის ღამის კლუბების ასოციაციასთან, შეხვედრები დაიწყო. მათი თქმით, ამ შეხვედრებზე საქმიანობის უსაფრთხო და მდგრადი აღდგენის საკითხებს განიხილავდნენ.

"შეხვედრაზე მიღწეულ იქნა შეთანხმება, რომ უახლოეს პერიოდში სექტორი განაახლებს ფუნქციონირებას, რისთვისაც მწვანე პასპორტებთან ერთად შრომის ინსპექცია სხვა კომპეტენტური უწყებების ჩართულობით შეიმუშავებს უსაფრთხოდ ფუნქციონირების პროტოკოლს, რომელიც უზრუნველყოფს მსგავსი ტიპის ივენთებზე მომხმარებელთა მაქსიმალურ დაცვას. აღნიშნული ინფორმაცია ჩვენი მხრიდან აქტიურად მიეწოდა სექტორში რეგისტრირებულ სხვადასხვა ბიზნეს სუბიექტს", — ვკითხულობთ განცხადებაში.

შრომის ინსპექციაში აღნიშნავენ, რომ ამის მიუხედავად ზოგიერთი ღამის კლუბი "რეგულაციების გვერდის ავლით", არანებადართული ღონისძიებების ორგანიზებას განაგრძობს, რის გამოც, მათი თქმით, ქვეყანაში არსებული ეპიდსიტუაცია უარესდება.

"სწორედ ამიტომ, შრომის ინსპექცია რეაგირებას მოახდენს ყველა არანებადრთული ეკონომიკური საქმიანობის გამოვლენის ფაქტზე. ამასთანავე გაცნობებთ, რომ შრომის ინსპექციის მიერ, მერიის, ეკონომიკის სამინისტროსა და ბიზნესომბუდსმენის ჩართულობით გრძელდება მუშაობა უსაფრთხოების სექტორულ პროტოკოლზე, რომელიც მნიშვნელოვნად შეამცირებს ინფექციის გავრცელების რისკებს", — აღნიშნავენ ინსპექციაში.

მათივე თქმით, სექტორული რეკომენდაციის/პროტოკოლის დამტკიცების შემდეგ, უახლოეს პერიოდში სექტორის ფუნქციონირების განახლებაა დაგეგმილი.

დღეს შრომის ინსპექციამ კლუბი KHIDI 10 000 ლარით დააჯარიმა და დალუქა. კლუბის განცხადებით, ესკალაციის თავიდან აცილების მიზნით, ტერიტორია დატოვეს, თუმცა პასუხისმგებელ პირებს "გონივრულ ვადა" მისცეს, რათა მათი მუშაობა დაუშვან. მათი თქმით, სხვა შემთხვევაში, "მხოლოდ წინააღმდეგობას მიიღებენ".