ჯორჯ მარტინი ხშირად გამოთქვამდა უკმაყოფილებას, რომ სამეფო კარის თამაშები რვა სეზონით არ უნდა დასრულებულიყო. 2019 წლის ოქტომბერში მარტინმა განაცხადა, რომ სერიალს 13 სეზონი სჭირდებოდა, რათა მოვლენები მისი წიგნების შესაფერისად განვითარებულიყო. მარტინის აგენტისგან ახლახან გახდა ცნობილი, რომ სერიალის გადაღებების დროს ჯორჯი არაერთხელ გაფრინდა ნიუ-იორკში HBO-ს აღმასრულებელ დირექტორთან, რათა შოუს გაგრძელებაში დაერწმუნებინა.

"ჯორჯი ნიუ-იორკში რამდენჯერმე გაფრინდა და ევედრებოდა რიჩარდ პლეპერს 10 სეზონი გადაეღოთ, რომლებშიც 10 ეპიზოდი იქნებოდა, რადგან ამისთვის საკმარისი მასალაც არსებობდა და ეს ფანებისთვის უფრო სასიამოვნო და დამაკმაყოფილებელიც იქნებოდა. თუმცა დევიდ ბენიოფი და დი ბი ვაისი გადაღლილები იყვნენ, თან სამართლიანადაც და სერიალის დასრულება სურდათ, ამიტომაც შეამოკლეს. ამის შემდეგ კი მოლაპარაკება იმის შესახებ მიდიოდა, რამდენი სეზონის გადაღება იქნებოდა შესაძლებელი ბენიოფის და ვაისის სერიალის ვერსიიდან, რადგან HBO-ს, რა თქმა უნდა, მეტი სურდა", — ამბობს მარტინის აგენტი.

ფოტო: HBO

სანამ 2019 წლის მაისში სამეფო კარის თამაშების ფინალური სერია გამოვიდოდა, მარტინმა პოსტი დაწერა და აღნიშნა, რომ შოუს მერვე წელს დასრულება მისთვის სევდიანი ამბავი იყო. "მსურს, რომ სერიალს კიდევ რამდენიმე სეზონი ჰქონდეს, მაგრამ გასაგებია, რომ რეჟისორებს სხვა საქმის კეთება სურთ და მსახიობებსაც, რომლებიც რვა წელია ამ სერიალში თამაშობენ, უნდათ სხვა როლებიც მიიღონ. ეს ყველაფერი სამართლიანია და გაბრაზებული არ ვარ, თუმცა ცოტათი მაინც ნაწყენი ვარ", — წერდა მარტინი.

მარტინი იმის გამოც ღელავდა, რომ შოუს მსახიობებთან ერთად თავს დიდი ოჯახის ნაწილად გრძნობდა. "როცა შოუ მთავრდება და თან ამდენი წლის შემდეგ, კიდევ უფრო რთულია, რადგან დიდი ხანი ნამდვილ ოჯახთან ერთად იყავი. თქვენ არა მხოლოდ მუშაობთ ამ ადამიანებთან, არამედ ცხოვრობთ კიდეც, რადგან კვირაში ხუთი ან შვიდი დღეც კი მათთან ერთად ხარ და ისინი შენს ცხოვრებაში ინტენსიურად ერთვებიან", — დასძინა მან.

შეგახსენებთ, რომ HBO სამეფო კარის თამაშების პრიქველზე, სახელად House of the Dragon, მუშაობს, რომლის პრემიერაც ახალ წელს იგეგმება, თუმცა გამოსვლის კონკრეტული თარიღი ჯერ არ არის ცნობილი.

ასევე იხილეთ: