რუსეთის საგარეო საქმეთა სამინისტრომ 19 მაისს, ხურჩაში მომხდარ მკვლელობაზე მორიგი განცხადება გააკეთა. მინისტრის პრესსპიკერის მარია ზახაროვას განცხადებით, კონფლიქტზე პასუხისმგებლები აფხაზები არიან.

"ინციდენტთან დაკავშირებით, როდესაც საქართველოს მოქალაქე მოკლეს, შემიძლია ხაზგასმით ვთქვა რომ კონფლიქტი აფხაზეთის საზღვრის დაცვის პასუხისმგებლობაში მყოფ ტერიტორიაზე წარმოიშვა. რუსული მხარე არაპირდაპირაც კი ვერ გაერეოდა ამ კონფლიქტში".

რუსეთის საგარეო საქმეთა სამინისტრომ აღნიშნულ მკვლელობასთან დაკავშირებით პირველი კომენტარი 20 მაისს გააკეთა. მათი განცხადებით, რუსეთს არანაირი კავშირი არ აქვს ამ ინციდენტთან. სამინისტრო განცხადებაში ქართულ მხარეს ურჩევს, ადამიანის ტრაგიკული სიკვდილით პოლიტიკური სპეკულაციების მოხდენას, სჯობს შესაბამისად უპასუხონ ქალაქ გალში მომხდარ ინციდენტს.

19 მაისს, ზუგდიდის რაიონის სოფელ ხურჩაში, საოკუპაციო ხაზის მიმდებარედ, ოთხმა შეიარაღებულმა პირმა ცეცხლსასროლი იარაღით გალის რაიონის სოფელ ბარღების მკვიდრ გიგა ოთხოზორიას ჭრილობა მიაყენა, რის შედეგადაც ის გარდაიცვალა.