სამხრეთ აფრიკაში მარიხუანას ლეგალიზების მოთხოვნით გამართულმა მასობრივმა პროტესტმა შედეგი გამოიღო. პირველი ინსტანციის სასამართლომ კანაფის პირადი მიზნებისთვის მოხმარება ლეგალურად სცნო.

ეს გადაწყვეტილება ნიშნავს, რომ სამხრეთ აფრიკელებს შეუძლიათ საკუთარ სახლში გაზარდონ და მოიხმარონ მარიხუანა.

სასამართლოს გადაწყვეტილება სამხრეთ აფრიკის პარლამენტს გადაეგზავნება, რომელმაც არსებული კანონის უარყოფა და ახალი კანონის ამოქმედება უნდა უზრუნველყოს. ამისათვის პარლამენტს 24 თვე აქვს.

სანამ პარლამენტი კანონის არ მიიღებს, სამხრეთ აფრიკაში მარიხუანას კულტივაცია-მოხმარება პირადი მიზნებისთვის ჯერ კიდევ დასჯადი იქნება. სამაგიეროდ, თუ ვინმეს დაიჭერენ ამ დანაშაულისთვის, ბრალდებულს რეალური ბერკეტი ექნება საკუთარი უდანაშაულობის დასამტკიცებლად.

პროტესტის ერთ-ერთი მონაწილე გარეთ პრინცი ამბობს, რომ ეს გადაწყვეტილება პოზიტიურად აისახება როგორც ქვეყანაზე, ასევე მის მოსახლეობაზე.

"ბოლოს და ბოლოს, პოლიცია აღარ გაფლანგავს რესურსებს ადამიანების დევნაში მარიხუანის მოწევის გამო. ეს დროის ფუჭი ფლანგვა იყო. ახლა უფრო მეტად ნამდვილი კრიმინალის აღმოფხვრაზე კონცენტრირდებიან," - ამბობს პრინცი.

გარეთ პრინცი მარიხუანას ლეგალიზაციის მოთხოვნით გამართული პროტესტის ერთ-ერთი მონაწილეა. სამხრეთ აფრიკის ნარკოპოლიტიკა მას პირადად შეეხო და მის პროფესიულ განვითარებას ხელი შეუშალა. როგორც ირკვევა, პრინცი სამართალმცოდნეობას ეუფლებოდა, როდესაც ის მარიხუანას მოხმარების გამო დააპატიმრეს. მან გადაიხადა ჯარიმა და სწავლა განაგრძო, თუმცა წარსულში ჩადენილი დანაშაულის გამო ლიცენზია არ მისცეს.

როგორც თავად ამბობს, ის რასტაფარის მიმდევარია, რომელიც აფრიკაში აღიარებული რელიგიაა. რელიგიის ამ მიმდინარეობაში ერთ-ერთი რიტუალის შესასრულებლად აუცილებელია კანაფის მოწევა. ამ არგუმენტით ხსნიდა თავის საქციელს პრინცი, მაგრამ ამან არ გაჭრა.