ადამიანის უფლებათა კომიტეტის თავმჯდომარის, მიხეილ სარჯველაძის განცხადებით, ის, რომ ევროპარლამენტარებმა ევროკავშირს სააკაშვილისადმი არაადამიანური მოპყრობის გამო სანქციების დაწესებაზე სერიოზულად მსჯელობისკენ მოუწოდეს, არ ნიშნავს, რომ სანქციები მართლა დაწესდება. მისი თქმით, 23 განმცხადებელი არ არის საკმარისი წინაპირობა იმისთვის, რომ ვიფიქროთ, მთელი ევროპა ამ აზრზეა.

"და ახლა ფიქრობთ, რომ ბორელს რომ მიმართა რამდენიმე, რამდენი ბრძანეთ? 23-მა ევროპარლამენტარმა, ეს ავტომატურად ნიშნავს, რომ გამოყენებული იქნება ეს სანქციები? არ იქნება ასე. ჩემთვის ნიშნავს იმას, რომ გარკვეული რაოდენობა ადამიანების არის, ვინც ფიქრობს ასე, რომ საქართველოს ხელისუფლებას დაშვებული აქვს ისეთი შეცდომები, რის გამოც შეიძლება თანამდებობის პირების მიმართ გამოყენებული იქნას სანქციები.

მე ასე არ ვფიქრობ და როგორც ჩანს, არ ფიქრობენ ასე სხვა ევროპარლამენტარები. თუ გგონიათ, რომ... 23 ბრძანეთ, ხომ? 23 განმცხადებლის გამო მთელი ევროპა ასე ფიქრობს, მე მგონი, რომ საკმარისი წინაპირობა ნამდვილად არ გაქვთ" — განაცხადა სარჯველაძემ პალიტრანიუსის ეთერში.

მისი მტკიცებით, ევროპარლამენტარების გადაწყვეტილება პოლიტიკურად მოტივირებული და "ცოტა მიკერძოებით ნაკვებია", რაც შეცდომაში შემყვანი შეიძლება აღმოჩნდეს. მისი აზრით, არადამიანურ მოპყრობაზე განცხადებები ნაადრევია და ეს სწორი მსჯელობა არ არის.

"ასეთ რამეს მივაქციოთ ყურადღება: ჩვენც შეგვიძლია, რა თქმა უნდა, საღი ლოგიკით გავარჩიოთ ამ შემთხვევაში რა შეიძლება იყოს სანქციის მიზეზი, მიზანი, საფუძველი და გავარჩიოთ, რა შეიძლება მოცემულ შემთხვევაში წარმოადგენდეს ამ შემთხვევაში, აი, საკმარისი საფუძველი ვინმეს თუ აქვს იმისთვის, რომ [სანქციები] გამოიყენოს", — აცხადებს სარჯველაძე.

23 ევროპარლამენტარი მიხეილ სააკაშვილის მდგომარეობასთან დაკავშირებით წერილს აქვეყნებს და აცხადებს, რომ ევროკავშირმა სერიოზულად უნდა განიხილოს სანქციები იმ პირების მიმართ, ვინც ექსპრეზიდენტის არაადამიანური და დამამცირებელი მოპყრობა დაუშვა.

წერილი ევროპარლამენტის პრეზიდენტს ურსულა ფონ დერ ლაიენს, ევროკავშირის უმაღლეს წარმომადგენელს საგარეო საკითხებში ჯოზეფ ბორელს და ევროსაბჭოს პრეზიდენტ შარლ მიშელს დაეგზავნა.