დღეს, 2 აპრილს 16:00 საათზე, ისანი-სამგორის მე-7 რაიონულ განყოფილებასთან შოთა პაკელიანის ოჯახის წევრები და მეგობრები აქციას გამართავენ. აქციას თეთრი ხმაურის მოძრაობაც შეუერთდება.

"თეთრი ხმაურის მოძრაობა სრულ მხარდაჭერას უცხადებს პაკელიანის ოჯახს და მზად არის მიმართოს ნებისმიერ გზას, რათა შოთა პაკელიანით დასრულდეს წლების განმავლობაში მიმდინარე უსაფუძვლო დევნა," - აცხადებს მოძრაობა.

აქციის მონაწილეები მოითხოვენ დამნაშავე პოლიციელების დასჯას და შოთა პაკელიანის განთავისუფლებას.

ოჯახის წევრები ამტკიცებენ, რომ სამართალდამცავები შოთა პაკელიანს დაკავებისას ფიზიკურად გაუსწორდნენ, რის გამოც ის საავადმყოფოში ოთხი დღის განმავლობაში უგონო მდგომარეობაში იმყოფებოდა.

თავის მხრივ, შინაგან საქმეთა სამინისტრო ამტკიცებს, რომ თავად ბრალდებულს პოლიციის მიმართ პრეტენზია არ გააჩნია.