ქართული ოცნების თავმჯდომარის, ირაკლი კობახიძის განცხადებით, შესაბამისმა ორგანოებმა ექსპრეზიდენტის სამოქალაქო კლინიკაში გადაყვანაზე გადაწყვეტილების მიღებისას უნდა გაითვალისწინონ, როგორც ჯანმრთელობის, ასევე, უსაფრთხოების საკითხი. მისი მტკიცებით, ოპოზიცია ხალხს არწმუნებს, თითქოს გადაყვანის შემდეგ სიტუაცია შეიცვლება, მაგრამ "მთელი უბედურება სწორედ გადაყვანის დღიდან" დაიწყება. ის ოპოენენტებს ბრალს დებს, რომ მიზნის მისაღწევად "სისხლისღვრაზეც წავლენ".

"სააკაშვილის გადაყვანაზე გადაწყვეტილებას მიიღებენ შესაბამისი ორგანოები და უწყებები და რა თქმა უნდა, საფუძველი იქნება, როგორც სამედიცინო მხარე, ასევე უსაფრთხოების მხარე. ორივე მხარე არის რა თქმა უნდა, თანაბრად გასათვალისწინებელი.

რაც შეეხება უსაფრთხოების და პოლიტიკურ ნაწილს, ცდილობენ საზოგადოებაში შექმნან განცდა, რომ სააკაშვილის სამოქალაქო კლინიკაში გადაყვანით ეს რაღაცა სპექტაკლი და უბედურება დასრულდება და ასეთი აღქმა გაჩნდა რეალურად მოსახლეობის გარკვეულ ნაწილში. თუმცა, მე მინდა გითხრათ, რომ მთავარი მიზანი რა არის? მთელი უბედურება დაიწყება სწორედ გადაყვანის დღიდან, ეს არის პოლიტიკური და უსაფრთხოების მხარე. აქედან გამომდინარე ჩვენ უნდა გავითვალისწინოთ ყველაფერი, ვიდრე შესაბამისი გადაწყვეტილება იქნება", — განაცხადა მან.

კობახიძე ისევ ამტკიცებს, რომ სააკაშვილის სამოქალაქო კლინიკაში გადაყვანა არ არის "უბრალო ახირება" და ამის უკან დგას კონკრეტული მიზანი, რომ გადაყვანის შემდეგ შექმნან გარკვეული შანსები მისი გათავისუფლებისთვის.

"ჩვენ ეს რისკები რა თქმა უნდა მხედველობაში უნდა მივიღოთ. ისინი ყველაფერზე წავლენ, სისხლისღვრის ჩათვლით, შემიძლია ეს ძალიან მკაფიოდ განვაცხადო. აქედან გამომდინარე ჩვენ ეს უნდა გავითვალისწინოთ, ჩვენ ვართ პასუხისმგებელი ყველაფერზე, მათ შორის, ადამიანების სიცოცხლეზე, რაც შეიძლება დადგეს რისკის ქვეშ, თუნდაც ძალიან მალე, მას შემდეგ, რაც ასეთი გადაწყვეტილება თეორიულად შეიძლება იყოს მიღებული", — განაცხადა მან.

ნაციონალურმა მოძრაობამ არაერთხელ განაცხადა, რომ სააკაშვილის სამოქალაქო კლინიკაში გადაყვანის შემთხვევაში, იქ აქციას არ გამართავს. ნიკა მელიამ მთავრობას შესთავაზა სპეციალური ჯგუფის შექმნა სააკაშვილის ტრანსპორტირების განსახილველად, რომელშიც სხვადასხვა პირი, მათ შორის სახალხო დამცველი და პირადი ექიმი ჩაერთვება.