წარმოშობით ქართველი მომღერალი, თამთა გოდუაძე, მუსიკის ციფრულმა სტრიმინგ პლატფორმა Spotify-მ თანასწორობის კამპანიის ფარგლებში საბერძნეთის სახედ წარადგინა.

მსოფლიო კამპანია EQUAL მუსიკის ინდუსტრიაში ქალების გაძლიერებასა და უკეთ წარმოჩენას ისახავს მიზნად. მის ფარგლებში, ყოველთვიურად, Spotify ათობით მომღერალს მსოფლიოს სხვადასხვა კუთხიდან ელჩად წარადგენს.

ნოემბერში თამთა საბერძნეთისა და კვიპროსის ელჩი გახდა. ამიტომ, კამპანიის ფარგლებში ბერძენი და კვიპროსელი მუსიკოსების ფლეილისტში თამთას პირველი პოზიცია უკავია, თავისი სიმღერით Hold On. მომღერლის ფოტო გამოსახულია ფლეილისტის გარეკანზეც.

ამასთან, თამთა ცოტა ხნის წინ გამოჩნდა ნიუ-იორკში, ტაიმს-სკვერზე განთავსებულ ბილბორდზეც.

"ძალიან მიხარია და, ამასთან, დიდი პატივია ჩემთვის, ვიყო Spotify-ის კამპანია EQUAL-ში საბერძნეთის სახე", — წერს თამთა ინსტაგრამზე, — "კამპანია მიზნად ისახავს მუსიკის ინდუსტრიაში ქალის როლის გაზრდასა და მისი ხმის გაძლიერებას. ამიტომ, მოდით, ამ უნიკალური კამპანიის ფარგლებში ჩვენც ვთქვათ სიტყვა. ქალი ხელოვანებისთვის თანასწორი გარემოს შექმნით, ყველას ერთად შეგვიძლია მსოფლიოს შეცვლა".

თამთამ 2004 წელს ბერძნულ Idol-ში მიიღო მონაწილეობა, სადაც მეორე ადგილი დაიკავა. მას შემდეგ, იგი ხმელთაშუაზღვისპირა ქვეყანაში ერთ-ერთი ყველაზე პოპულარული პოპმომღერალი გახდა. 2019 წელს მან ევროპის უდიდეს მუსიკალურ კონკურსზე, ევროვიზიაზე, კვიპროსი წარადგინა, სადაც ფანების დიდი მოწონება და ფინალში მე-13 ადგილი დაიმსახურა.