ქართული ოცნების დეპუტატი, ირმა ზავრადაშვილი მიიჩნევს, რომ სახალხო დამცველი მიერ შექმნილი ექიმთა კონსილიუმი ნათესავებითა და პარტიული ინტერესებით შეპყრობილი ადამიანებისგანაა დაკომპლექტებული და მას არ ენდობა.

"ვერ ვენდობი კონსილიუმს, რომელსაც არ აქვს შესწავლილი სამედიცინო დაწესებულება რითია აღჭურვილი, ვინ არის მკურნალი ექიმი [...] სახალხო დამცველის ნათესავებით და პარტიული ინტერესებით შეპყრობილი ადამიანებისგან არ უნდა იყოს კონსილიუმი დაკომპლექტებული", — ამბობს ის.

მმართველი გუნდისადმი კრიტიკული განცხადებების გამო ქართული ოცნების წევრები სახალხო დამცველს, ნინო ლომჯარიას ხშირად ადანაშაულებენ პარტიულობასა და მიკერძოებულობაში. ექსპრეზიდენტის მონიტორინგისთვის ექიმების ჯგუფის შექმნის შემდეგ მასზე უარყოფითი შეფასებები გაძლიერდა. ამ მხრივ ყველაზე მეტად გამოირჩევა პარტიის თავმჯდომარე ირაკლი კობახიძე, რომელიც ლომჯარიას ენმ-ს აქტივისტად მოიხსენიებდა, ახლა კი მის მოწვეულ ექიმების ჯგუფს უწოდებს პოლიტიკურად მიკერძოებულებს. გარდა ამისა, მან სახალხო დამცველისა და სამედიცინო სფეროს წარმომადგენლების შესაძლო პასუხისმგებლობაზე ილაპარაკა.

აღსანიშნავია, რომ რამდენიმე დღის წინ, ხელისუფლების კრიტიკის შემდეგ ომბუდსმენს აშშ-ის ელჩი საქართველოში კელი დეგნანი და ევროპარლამენტარები გამოექომაგნენ, რომლებმაც აღნიშნეს, რომ სახალხო დამცველის ინსტიტუტი კრიტიკას ნაცვლად, ქებას იმსახურებს.