ყოფილი იუსტიციის მინისტრისა და მოქმედი კულტურის მინისტრის, თეა წულუკიანის განცხადებით, თუ ექსპრეზიდენტ მიხეილ სააკაშვილის სამოქალაქო კლინიკაში გადაყვანა საჭირო გახდება, მას გადაიყვანენ. მისი მტკიცებით, ამ ეტაპზე, "განგაშის საფუძველი არ არსებობს".

"როდესაც მე მქონდა შესაძლებლობა, 2 წლის მანძილზე იუსტიციის მინისტრის რანგში მემართა პენიტენციური სამსახური, პრინციპი იყო ერთი — თუ პატიმარს სჭირდება სამოქალაქო სექტორში გადაყვანა, ის არის გადაყვანილი. მანამ, სანამ მას ეს არ სჭირდება, ის მკურნალობს საპატიმრო პირობებში ან ციხის სამკურნალო დაწესებულებაში. [...] არ არსებობს არავითარი განგაშის საფუძველი, შეგიძლიათ იყო მშვიდად, იმიტომ, რომ როგორც კი და თუ გაჩნდება სამოქალაქო კლინიკაში გადაყვანის საფუძველი, რა თქმა უნდა, როგორც ამას ყოველთვის აკეთებდა პენიტენციური სამსახური, ეს ამ შემთხვევაშიც გაკეთდება", — ამბობს ის.

წულუკიანმა აღნიშნა, რომ სააკაშვილი ერთადერთი არაა, ვინც საპატიმროში შიმშილობს და მას პროტესტის ამ ფორმის შეწყვეტისკენ მოუწოდა.

"შიმშილობა აზიანებს ჯანმრთელობას, ამიტომ ეს არ არის ის ფორმა, რომელსაც მე მივესალმებოდი და იმედი მაქვს, რომ ეს ადამინები მალე შეწყვეტენ პროტესტის ამ ფორმას. მე დარწმუნებული ვარ, რომ მიხეილ სააკაშვილი არ არის ერთადერთი, ვინც საპატიმროში შიმშილობს. მინდა ვუსურვო ჯანმრთელობა და კვლავ მოვუწოდო საკუთარი სიცოცხლისა და ჯანმრთელობის დაცვისკენ. სახელმწიფო კი თავის ვალდებულებებს, რა თქმა უნდა, ბოლომდე შეასრულებს", — თქვა მან.

გუშინ, 17 ნოემბერს სახალხო დამცველის მიერ შექმნილმა ექიმების ჯგუფმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს გლდანის მე-18 დაწესებულების კლინიკა არ აკმაყოფილებს.

ექსპრეზიდენტი უკვე 49-ე დღეა შიმშილობს. მიხეილ სააკაშვილი და მისი ადვოკატები სამოქალაქო კლინიკაში გადაყვანას ითხოვენ, თუმცა ხელისუფლება უარზეა — ამის ნაცვლად ის გლდანის ციხის სამკურნალო დაწესებულებაში იძულებით შეიყვანეს.

სტრასბურგის სასამართლომ, მხარეთა ინტერესების შესაბამისად და სასამართლო პროცედურების სწორად წარმართვისთვის, სააკაშვილს შიმშილობის შეწყვეტისკენ მოუწოდა. ამის შემდეგ სააკაშვილმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.